АЗИ ХҮҮХДҮҮДИЙН ХАРАА МУУДАХ НЬ ИХЭСЧЭЭ

Хятадад нүдний шилний бизнес тун амжилттай байна. Бээжинд дөрвөн давхар худалдааны төв зөвхөн нүдний шилээр дагнасан байдаг нь үүнийг харуулна. Харин тэдний гол үйлчлүүлэгчид нь хүүхдүүд. Хятадад 1970-аад оны үед 16-18 насны хүүхдүүдийн гуравны нэг нь холын хараа муу байсан гэдэг. Тэгвэл одоо тавны дөрөв нь, зарим төвлөрсөн хот сууринд түүнээс ч илүү хувь нь холын хараа муу гэсэн дүн гарчээ. Тэдний 20 хувь нь хүнд хэлбэрийн буюу 16 см-ээс цаашхийг харж чаддаггүй байна. Энэ байдал дунд сургуулийнхны дунд хүчтэй дэлгэрч 2000 онтой харьцуулахад хоёр дахин өсч 40 гаруй хувьд хүрчээ.

Зөвхөн Хятад гэлтгүй зүүн Азийн орнууд тухайлбал Сингапур, Өмнөд Солонгос, Тайвань улсуудад 18 настнуудын 80-90 хувь холын хараа муу байгаа гэнэ. Асуудлын гол нь удамшлын гэхээсээ илүү нийгмийн шалтгаантай. Үүнд хичээл номонд их цаг зарцуулах, электрон төхөөрөмжийн дэлгэц удаан харах, гадаа гарах цаг бага байх зэрэг орж байна.