УУЛ РУУ ӨГСДӨГ ДҮҮЖИН ГАЛТ ТЭРЭГ НЭЭЛТЭЭ ХИЙЛЭЭ

Швейцарын төмөр замын хөгжил үсрэнгүй түвшинд хүрснийг шинээр нээлтээ хийсэн уул руу өгсдөг галт тэрэг харуулав. Энэхүү гайхамшигт галт тэргээр цагт 1500 зорчигчийг Альпийн нурууны оргил өөд тээвэрлэх юм. Швейцарын "Stoos" амралтын газар ирсэн жуулчид энэхүү галт тэргээр үйлчлүүлж, секундэд 10 метрийн хурдтайгаар далайн түвшнээс дээш 743 метрийн өндөрт гарч болно.

Энэ галт тэрэгний нууц нь гаднаасаа нефтийн торх мэт харагдах цилиндр хэлбэртэй зорчигчийн бүхээгтэй холбоотой гэнэ. Эдгээр цилиндр бүхээг нь өөрөө эргэж, оргил өөд өгсөж, уруудах үед зорчигчдыг донслохгүйгээр тээвэрлэдэг байна. Бүхээгнүүд нь "ABB motors" корпорацийн үйлдвэрлэсэн тусгай олсоор бэхлэгдэж, зорчигчдыг саадгүй дээш хүргэдэг ажээ.

Ийнхүү 14 жилийн турш төлөвлөж, байгуулсан уг төслийг хараад хүн бүр бахархана гэдэгт итгэлтэй байгаагаа Швейцарь улсын төмөр замын албаныхан дурдлаа. Энэ бүтээн байгуулалтад нийт 52,6 сая ам.доллар зарцуулсан бөгөөд 48 градусын налуу замаар эгц дээшээ өгсөж буй нь дэлхийд байхгүй үзүүлэлт юм.