ДҮРВЭГСДИЙН ХУАРАНД ЭМЭГТЭЙЧҮҮД ЯАГААД ЖИВХ ӨМСДӨГ ВЭ?

Грекийн дүрвэгсдийн хуаранд дайн, үймээнтэй хөрш зэргэлдээ орнуудаас өдөрт 200 хүн ирдэг байна. Тэнд амьдарч буй эмэгтэйчүүдийн нөхцөл байдал үнэхээр хүнд байгааг хүмүүнлэгийн байгууллагын тайлан харуулав. Хүйтний улиралд ганц дан майханд нялх нярай хүүхэдтэй эхчүүд тусламжийн хоолоор амь зууж байгаа ажээ.

Харамсалтай нь, дүрвэгч эмэгтэйчүүд нийтийн бие засах газарт хүчиндүүлэх явдал ихэссэн тул шөнөдөө том хүний живх өмсөж унтдаг болжээ. "Энэ нь дэлхий нийт дүрвэгч охид, бүсгүйчүүдийг огт хайхрахгүй байгааг харуулж байна. Тэдэнд зориулсан аюулгүй бие засах газар, ариун цэврийн өрөө алга" хэмээн дээрх тайланд дурджээ. Хүчирхийлэлд өртсөн эмэгтэйчүүд янз бүрийн хүнд өвчин авах, сэтгэл санааны цочролд орох зэргээр хохирдог байна.

Тиймээс охидоо дүрвэгсдийн хуаран дахь бусад эрчүүдийн хүчирхийлэл, түрэмгийллээс хамгаалахын тулд эрт гэрлүүлэх болжээ. Зөвхөн Иордан дахь Заатари дүрвэгсдийн хуаранд одоогоор Сирийн 80 мянган дүрвэгч байгаа юм. Энэ дүрвэгсдийн хуаранд 6500 гаруй нярай хүүхэд байгаагийн 5 хувийнх нь ээжүүд нь 18-аас доош насандаа төржээ. Сири охидын 13 орчим хувь нь 18-аас доош насандаа гэрлэдэг гэсэн баримт бий.