ХЯТАДЫН ЭДИЙН ЗАСГИЙН ӨСӨЛТ УДААШИРЧ БАЙНА

Хятадын Үндэсний статистикийн хорооны тайланд дурдсанаар 2017 онд эдийн засгийн өсөлт 6,8 хувьд хүрсэн бол ирэх онд энэ үзүүлэлт буурах юм байна. Өнгөрсөн онд эдийн засгийн өсөлт 6,7 хувьд хүрсэн нь сүүлийн 26 жилд байгаагүй доогуур үзүүлэлт ажээ.

Энэ бууралт нь орон сууцны үнийн хөөрөгдөл, түүнийг дагасан чанаргүй зээлтэй холбоотой гэнэ. 2016 онд Хятадын эдийн засгийн төв хорооноос нэг, хоёрдугаар зэрэглэлийн хотуудад орон сууц, барилгын үнийг хатуугаар тогтоох шийдвэр гаргасан боловч амьдрал дээр хэрэгжих нь үр дүн муутай байна. Учир нь хотуудын захиргаа өөрсдийн санхүүгээ авч явахад орон сууцны бизнес ашгаа өгдөг учир үнэ бууруулах талаар дорвитой арга хэмжээ авахыг хүсэхгүй байгаа ажээ.

Бээжингийн их сургуулийн профессор Фан Янг эдийн засгаа дэмжих шинэчлэл, тогтвортой хөгжлийн бодлого боловсруулах шаардлагатай гэв. Хятадын төр засаг экспортод бус, дотоодын эрэлт хэрэгцээнд суурилсан эдийн засгийг хөгжүүлэх чиг барьж буйг шинжээчид тэмдэглэж буй юм.