ХҮН ЗӨӨВӨРЛӨДӨГ АВТОБУСААР ХУУЛЬ БУС АНГИЙН АРЬС ХИЛ ДАВУУЛДАГ БОЛЖЭЭ

Авто тээврийн үндэсний төвийн хэлтсийн дарга нартай холбоотой хар бараан мэдээлэл хэвлэлийн хуудаснаас салахаа байв. Хамгийн сүүлд л гэхэд энэ сарын эхээр тус төвийн мэдэлд зорчигч тээврийн үйлчилгээнд явдаг автобусанд их хэмжээний тарваганы арьс нууж хилээр гарах гэж байгаад саатуулагдсан тухай таагүй мэдээлэл юм. БНХАУ-ын хил дээр 12-р сарын 06-ны өдөр "Замын-Үүд"-"Эрээн хот"-ын чиглэлд зорчдог ДГО 56-73 улсын дугаартай 45 хүний суудалтай том оврын автобуснаас 300 ширхэг тарвагны арьс илэрчээ.

Уг хууль бус үйл ажиллагааны тухай ССТВ-13 болоод тус улсын мэдээллийн сайтуудаар "тарвагны арьсыг монголын талаас хууль бусаар хил нэвтрүүлэх гэж байгаад баригдлаа" гэх мэдээлэл тухайн өдрөө цацагдсан байна. Одоогоор тус автобусны жолооч Б-г БНХАУ-ын хоёр иргэний хамт Эрээн хотын цагдаагийн газар шалгаж байгаа юм. Автобусны жолооч Б нь 2007 оноос хойш АТҮТ-д ажиллаж байгаа бөгөөд арьсыг тээврийн хэрэгслийнхээ хөдөлгүүрийн хажуугаар нуусан байжээ. Нийтийн тээврээр нь хууль бус ангийн арьс нэвтэрч байхад Монголын талын мэргэжлийн хяналт, гааль, хилийн цэргийнхэнээс огт мэдээгүй нэвтрүүлсэн байх юм.

Нэр бүхий иргэд тухайн арьсыг АТҮТ-ийн дарга П.Дэлгэрнарангийнх, тус төвийн дарга нь өөрөө баривчлагдсан тухай өөрийн цахим хуудсандаа бичжээ. Гэхдээ П.Дэлгэрнаран нь тэр өдөр Архангай аймагт ЗТХ-ийн сайд Ж.Бат-Эрдэнэтэй томилолтоор явж байсан аж. Тарваганы арьс тээвэрлэж явсан автобусыг одоогоор Эрээн хотын цагдаагийн газар битүүмжилсэн, хохирлын хэмжээг тогтоосны дараа торгууль ногдуулж, автобусыг Монголын талруу шилжүүлнэ гэж мэдэгдсэн байна. Тухайн хэрэгт сэжиглэгдэн Эрээн хотын цагдаагийн байгууллагад шалгагдаж байгаа автобусны жолооч П.Батбаатарын эхнэр нь "манай нөхрийн тарваганы арьс, би шүүп хийлгэхээр нөхөртөө өгч явуулсан" тухай мэдүүлээд байгаа ажээ. Эх сурвалжийн мэдээлж байгаагаар 300 ширхэг тарваганы арьс байгаагүй бөгөөд харин 1000 ширхэг байсан тухай хэлж байгаа юм.