Зээлээр авсан машинаа жолооны эрхгүй хүнд мөргүүлж хураалгах дээрээ тулаад байна

Б.Батмөнх өнгөрсөн оны арваннэгдүгээр сард Prius 30 маркийн автомашиныг ББСБ-аас зээлээр авчээ. Тэрбээр автомашинаараа ажил хөдөлмөр эрхэлж, гэрийнхээ өдөр тутмын хэрэгцээг хангадаг байжээ.
Гэвч энэ оны дөрөвдүгээр сард замын хөдөлгөөнд оролцож байх үед нь жолоодох эрхгүй хүн араас нь мөргөж, автомашинд нь 4 сая 465 мянган төгрөгийн хохирол учруулсан байна.

Хохирогчийн хэлж буйгаар, уг хэргийг хариуцан ажилласан Баянгол дүүргийн цагдаагийн дэслэгч А.Нямцэцэг хоёр тал харилцан зөвшилцөж, асуудлаа шийдвэрлэж амжаагүй байхад нэг талыг барьсан хэргийг гуравхан хоногийн дотор хаасан гэлээ. Мөн дэслэгч түүнд “Би хэргийг хаачихсан. Та өөрөө наад хүнээ олж, учраа ол” хэмээн хэлжээ.
Б.Батмөнх уг асуудлаар холбогдох байгууллага болон удирдлагуудад хандсан ч одоог хүртэл дорвитой хариу, шийдэл авч чадахгүй байгаа талаар ярьсан юм.

Ослын улмаас автомашин нь эвдэрч, ажил хөдөлмөр эрхлэх боломж нь хязгаарлагдсан түүний хувьд зээлийн төлбөрөө төлөхөд ч хүндрэл үүсжээ. Улмаар автомашинаа хураалгах дээрээ тулжээ. Амьдралаа залгуулдаг ганц унаагаа осолд алдсан түүний хувьд учирсан хохирлоо хэрхэн барагдуулах, цаашид амьдралаа яаж авч явах вэ гэдэг асуудал хүнд дарамт болж байна гэж хэллээ. 

Ярилцлагыг эндээс үзнэ үү.