Шатахууны үнэ 560 төгрөгөөр нэмэгдэж, иргэд 24 цаг оочерлоод ч шатахуун авч чадахгүй байна

Заригийн сурвалжлах баг шатахууны үнэ нэмэгдэж, хомсдол үүссэн асуудлаар Баянхошуу, Зурагт орчмын шатахуун түгээх станцуудад ажиллаж, иргэдийн байр суурийг сонслоо.

Сурвалжлагын үеэр иргэд АИ-92 автобензиний үнэ 560 төгрөгөөр нэмэгдэх гэж байгааг түгээгчээс мэдсэн гэв. Мөн өмнө нь таван зургаан цаг оочерлож байж шатахуун авдаг байсан бол одоо 24 цаг оочерлоод ч шатахуун авч чадахгүй байгаагаа хэллээ.

Иргэд шатахууны үнэ нэмэгдэхийн өмнө хомсдол үүсдэгт бухимдаж, амьдралын өртөг нэмэгдэж, ард иргэдийн амьдрал улам хүндэрч байгааг онцолсон юм.

Сүүлийн таван жилийн хугацаанд төрөөс шатахуун импортлогч аж ахуйн нэгжүүдийг дэмжихэд нэг их наяд гаруй төгрөг зарцуулсан гэх мэдээлэл бий. Гэвч төрийн дэмжлэг иргэдэд бодитой үр өгөөжөө өгч байгаа эсэх, шатахууны хомсдол болон үнийн өсөлтийг яагаад тогтвортой шийдвэрлэж чадахгүй байгаа нь анхаарал татсан асуудал хэвээр байна.