Томуугийн өвчлөлийн 40-70 хувийг тав хүртэлх насны хүүхдүүд эзэлж байна

Манай улсын хувьд аравдугаар сарын сүүлээс томуу, томуу төст өвчний идэвхжил аажмаар нэмэгддэг. Өнөөдрийн байдлаар томуугийн өвчлөлийн 40-70 хувь нь тав хүртэлх насны хүүхдүүд эзэлж байна. Тиймээс бага насны хүүхдийн дархлааг дэмжих, томуугаас урьдчилан сэргийлэх вакцинд хамруулахыг мэргэжлийн байгууллагууд уриалж буй юм. Томуугийн вакцинд багш нар 100 хувь хамрагдсан бөгөөд архаг хууч өвчтэй 32 мянган иргэдийн 72 хувь нь хамрагдаад байгаа юм. Вакцины хамрагдалт өндөр байснаар 10, 11 сард томуугийн дэгдэлт гарахгүй, эмнэлгийн ачаалал нэмэгдэхгүй байхад эерэгээр нөлөөлнө гэж үзэж байгаа юм.  

Томуугийн үед түгээмэл илрэх шинж тэмдэг

Томуугийн шинж тэмдэг ханиаднаас илүү хүнд явцтай байдаг. Томуугийн халдварын үед хоолой хөндүүрлэж өвдөх, халуурах, толгой өвдөх, булчин зангирч өвдөх, хамар битүүрэх, ханиалгах зэрэг шинж тэмдэг илэрдэг.  Томуугийн ихэнх шинж тэмдэг 2-5 хоногийн хугацаанд аажим намждаг. Гэвч 7 ба түүнээс дээш хоногоор биеийн байдал сайжрахгүй байх тохиолдол элбэг. Томуугийн түгээмэл тохиолдох хүндрэл нь уушгины хатгаа бөгөөд бага насны хүүхдүүд, ахмад настан, уушги, зүрхний өвчтэй хүмүүс илүү өртөмтгий байдаг. Амьсгаадах шинж тэмдэг илэрвэл эмчид хандах шаардлагатай. Хатгааны үед халуурах нь түгээмэл бөгөөд халуун буусан ч 1-2 өдрийн дараа дахин халуурна.

Томуугаас хэрхэн сэргийлэх болон хэрхэн эмчилгээ хийлгэх вэ

Ханиадны адилаар томуугийн вирус бидний хамар, нүд, амны салстаар дамжин биед нэвтэрдэг. Иймд гараа тогтмол угааж, халдваргүйжүүлж, нүд, хамар, амандаа гараараа хүрэхгүй байх нь ханиад, томуугаас сэргийлэх үр дүнтэй арга юм.Гараа тогтмол угаахаас гадна томуугийн вакцин хийлгэж, улирлын томуугаас сэргийлэх боломжтой. Вакцин хийлгэснээс 2 долоо хоногийн хугацаанд томуугийн вирусийн эсрэг бие биед үүсэж, дархлаа тогтдог. Манай орны хувьд есдүгээр сарын 15-аас аравдугаар сарын 15-ны хооронд томуугийн вакцин хийлгэх нь тохиромжтой гэж үздэг. Анх удаа томуугийн вакцин хийлгэж байгаа хүүхдэд 1 сарын зайтай 2 тун тарина. Томуугийн халдвар авсан үед вирусийн эсрэг эмчилгээ хийлгэх нь үр дүнтэй байдаг.