"Монгол Үндэсний бөх-Бидний үе дамжсан өв соёл, Үндэсний бахархал” шинэчлэлийн аяныг эхлүүллээ

"Монголын Үндэсний Бөхийн Холбоо “Монгол Үндэсний бөх-Бидний үе дамжсан өв соёл, Үндэсний бахархал” шинэчлэлийн аяныг эхлүүлж байна. Энэхүү санаачилга нь Монголын бахархал болсон үндэсний бөхийн гайхамшгийг хадгалахаас гадна, спортыг орчин үеийн мэргэжлийн түвшинд хүргэх шинэлэг, дэвшилтэт алхам болно.

  Шинэчлэлийн хөтөлбөр нь үндсэн гурван хэсгээс бүрдэж буй юм. яМонгол Бөхийн өргөөг жилийн 365 хоногийн турш байнгын ажиллагаатай байлгаж, зөвхөн Монгол үндэсний бөх төдийгүй өв соёлын төв болгохоор зорьж байна. Мөн бөхийн барилдаан үзэхээр өргөөнд ирсэн үзэгч олон барилдаанаа үзэн сонирхож сэтгэлийн цэнгэл эдлэхээс гадна тав тухыг мэдрэх, бөхчүүд өргөөндөө барилдахаас гадна хамтдаа цуглах, боловсрох, өв соёлоо түгээдэг байх бодлогын өөрчлөлтүүд багтсан аж.

Шинэчлэлийн хүрээнд барилдааны нэгдсэн цаглавартай болох юм. Бөхийн барилдааны нэгдсэн цаглавар системтэй болсноор Бөхийн өргөөний барилдаанууд улирлын чансаатай болж, намраас зун хүртэл үзэгчдээ уйдаахгүй байх олон хөтөлбөрүүд багтсан байна.

Бөхчүүдийн хөгжлийн хөтөлбөр энэхүү шинэчлэлд мөн багтсан бөгөөд гурван үеийн хэлхээс болсон өв уламжлагчид болох бөхчүүд дэвжээн дээр ч, бусад үед ч нийт түмэнд үлгэр дуурайлал үзүүлэгч, соёлын элч байх юм.

Дээрх шинэчлэлийн гол хамтрагч нь NTV телевиз байх ба 18 жилийн түүхтэй тус телевиз Монгол Бөхийн өргөөнд болж буй барилдаан бүрийг онцгой бүрэн эрхтэйгээр дамжуулахаар болсон юм. Монголын Үндэсний Бөхийн Холбоо орчин үеийн спортын хөгжлийн чиг хандлагын дагуу телевизийн дамжуулалтын онцгой эрхийн сонгон шалгаруулалтыг 2024 оны есдүгээр сард зарлаж, сонгон шалгаруулалтад өргөн нэвтрүүлгийн олон телевиз оролцсоноос NTV телевиз шалгарсан болно.

Ийнхүү уламжлалт бөхийн барилдааныг үзэгчдэд үнэ төлбөргүй, дуу дүрсний өндөр чанартай, шинэ формат, хамгийн сүүлийн үеийн технологийн дэвшлээр хүргэх хариуцлагатай үүргийг NTV телевиз аваад байгаа юм. Үүнийг баталгаажуулж Монголын Үндэсний Бөхийн Холбооны Тэргүүн Ц.Магалжав, “Медиа групп” ХХК-ийн Гүйцэтгэх захирал А.Баярбат нар гэрээнд гарын үсэг зурж, албан ёсоор хамтын ажиллагааг эхлүүлээд байна.