Өрлөг жанжны их танхимыг байгууллаа

Монгол Улсад орчин цагийн музейн салбар үүсэж хөгжсөний 100 жилийн ойн хүрээнд хүүхэд залууст эх оронч, хилч үзлийг төлөвшүүлэх, цэргийн алба хаагчдад цэргийн дээд цолны үнэ, цэнийг мэдрүүлэх зорилгоор БНМАУ-ын гурван маршалын нэрэмжит Өрлөг жанжны их танхимыг Хил хамгаалах ерөнхий газарт байгууллаа. 

Өрлөг жанжны их танхимд Улсын хилийн музейн архиваас гурван маршалын эдэлж хэрэглэж байсан хувцас хэрэглэл болон эд зүйлсийг байршуулсан байна. Мөн чөлөөт уран бүтээлч Т.Алтанбагана, Ц.Насантогтох нар энэхүү танхимыг байгуулахад хүндтэй үүрэг гүйцэтгэсэн бөгөөд нээлтийн үеэр ХХЕГ-ын даргын тушаалаар “Хилийн төлөө” тэмдгээр шагнуулав. Тэд гурван маршалын хөрөг зурагт зориулан Африкийн улаан модоор тусгайлан жааз урласан байна.

Орчин цагийн музей үүсэж хөгжсөний түүхэн 100 жилийн ойг тохиолдуулан зохион байгуулж буй тус танхим цаашид улам өргөжиж зарим үзмэрүүдийг виртуал хэлбэрт оруулах болон Хилийн цэргийн музейн өргөтгөл удахгүй ашиглалтад орж илүү сонирхолтой олон үзмэртэй болж байгаа аж.