Д.Сарангэрэл: Миний хань П.Сүхбат "Арслан" цолоо авч чадаагүй гомдолтойгоор хорвоогоос буцсан

Инээдэг Сүхбат, том Сүхбат нэрээр олноо алдаршсан улсын гарди Пунцагийн Сүхбат асны арслан цолоо авч чадаагүй харамсалтай түүхийг бид нэхэн сурвалжиллаа.

П.Сүхбат асан Ардын хувьсгалын 70 жилийн ой буюу 1991 оны төрийн наадамд улсын заан О.Балжиннямтай урамтай сайхан барилдаж үзүүрлэж байсан түүхтэй. Бөхийн холбооноос Ардын хувьсгалын тэгш ойтой жилүүдэд амжилттай барилдсан бөхчүүдэд даваа ахиулж цол олгодог байсан. Энэ дагуу П.Сүхбат гарди арслан цолны болзол хангасан ч цолоо нөхөн авч чадаагүй юм. Түүнийг давж түрүү бөх болж байсан улсын заан О.Балжиннямд арслан, аварга цолуудыг нөхөн олгож байжээ. Мөн улсын заан Д.Мөнх-Эрдэнэд 1992, 1993, 1995 онуудад үзүүрлэсэн амжилтыг нь үндэслэж арслан цолыг нь нөхөн олгож шийдвэрлэсэн зэргээс харахад улсын гарди П.Сүхбатыг илт ялгаварлан гадуурхсан шийдвэр гаргасан гэж ар гэр нь үзэж байна.

П.Сүхбат асны гэр бүл Монгол Улсын Ерөнхийлөгч У.Хүрэлсүхэд “Нийслэл дэх Захиргааны хэргийн анхан шатны шүүхийн 2022.06.13 өдрийн 499 шийдвэрийг үндэслэн Ховд аймгийн Буян сумын уугуул, Баянхонгор аймгийн Баян-овоо сумын харьяат, Налайх дүүргийн бөх, Монгол Улсын гарди асан Пунцаг овогтой Сүхбатад зарлигаараа Монгол Улсын арслан цолыг нөхөн олгож өгөхийг хүсье” гэсэн агуулга бүхий хүсэлт болон шүүхийн шийдвэрийг нь хүргүүлсэн ч сураг тасарчээ. Бид энэ талаар Ерөнхийлөгчийн Тамгын газрын хэвлэл мэдээллийн албаны дарга Ө.Золбаяраас тодруулахад “Манайд П.Сүхбат гардитай холбоотой шүүхийн шийдвэр,  хүсэлт ирээгүй” гэдэг тайлбарыг өгсөн юм.