"Mango" зар сурталчилгаандаа хүний оронд хиймэл оюунаар бүтээсэн моделиудыг ашиглаж байна

Хиймэл оюун ухаан орлож магадгүй ажлын байрнуудын жагсаалтад хувцас загварын салбар нэмэгдэх шинжтэй

Испанийн “fast-fashion” худалдааны сүлжээ “Mango” зар сурталчилгааны ажлаа илүү хурдтай болгохын тулд хиймэл оюунаар бүтээсэн аватар ашиглаж, жинхэнэ моделийн ажлыг орлуулах болжээ. Харин хиймэл оюунаар бүтсэн моделиудын өмсөж байгаа хувцас нь бодит бөгөөд үйлчлүүлэгчид худалдан авах боломжтойг тус компанийн Гүйцэтгэх захирал Тони Руиз мэдээлжээ.

“Mango”-ийн гол өрсөлдөгчид болох “Inditex”-ийн “Zara” болон “H&M” брэндүүд загварын трендийг хоцрохгүй дагаж, боломжийн үнээр бүтээгдэхүүнээ борлуулдаг. Харин “Mango” тэдэнтэй өрсөлдөхийн тулд хиймэл оюун ашиглаж, бизнесийнхээ өөр нэгэн чухал талбарт өсөлтөө эрчимжүүлэхийг зорьж байна. “Хурдан хугацаанд контент бүтээх нь бидний зорилго” хэмээн Тони Руиз онцолж байлаа.

Тус компани долоодугаар сард хиймэл оюунаар бүтээсэн анхны зар сурталчилгаагаа цацаж, өсвөр насны охидод зориулагдсан коллекцоо сурталчилжээ. Харин хамгийн сүүлд энэ сард гаргасан зар сурталчилгааны зорилтот бүлэг нь мөн өсвөр насныхан аж. Цаашид технологийн хэрэглээг эрэгтэй, эмэгтэй коллекцдоо өргөжүүлэхээр төлөвлөөд байгаа ч эцсийн шийдвэрээ хараахан гаргаагүй байгаа юм.

2.5 их наяд ам.доллароор хэмжигдэх дэлхийн загварын салбарын шилжилтийг хиймэл оюун чиглүүлж буй. Хиймэл оюунаар модель бүтээдэг компаниудтай аль хэдийн хамтын ажиллагаа эхлүүлээд буй “Levi Strauss”, “Louis Vuitton”, “Nike” зэрэг компани дээр “Mango” ийнхүү нэмэгдэж байна. “Хиймэл” моделиуд ашиглахад гарах зардал “жинхэнэ” моделиудын цалингийн өчүүхэн хэсэгтэй тэнцэх тул санхүүгийн үр ашиг нь илт байгаа юм.

Эх сурвалж: Bloomberg tv