Б.Пүрэвдорж: Сэтгүүлчийг бус нөлөөнд автсан гээд байгаа шүүгчийг нь шүүгээч, сүүлдээ сэтгүүлчийн сошиал хуудсыг нь хязгаарлана гэнэ үү

УИХ-ын гишүүн Б.Пүрэвдорж "Шүүх гурван шатаараа л явдаг. Хуулийн хүрээндээ асуудлаа шийдээд явж байгаа гэж бодож байна. Мэдээж хүн л шийдэж байгаа учраас алдаа гаргах юм байна. Тэрийг нь дараагийн шатанд засах боломжийг үндсэн хууль болон бусад хуулиаараа олгоод өгчихсөн. Шүүх дээр мэдээж алдаа гаргахгүй гэж байхгүй, гарч байгаа. Дараагийн шатандаа засагдаад явж байгаа гэж ойлгож байна. Монгол улс ямар ч үед хоёр зүйл дээр хатуу байх ёстой. Нэгдүгээрт, ардчилал, хүний эрх, үг хэлж хэвлэн нийтлэх эрхийг хамгаалах, мэдээлэл олж авах эрхийг хангах нь төрийн байгууллагын гол үүрэг. Сүүлийн үед иргэд ч энэ асуудлыг нэлээн ярьдаг болсон. Хоёрдугаарт, парламентийн тогтолцоо. Энэ хоёр бол Монгол улсын хоёр том багана. Сэтгүүлч Н.Өнөрцэцэгийн тухайд Хэнтий аймгийн найман ишигтэй холбоотой асуудал үүссэн гэж ойлгосон. Би Зариг.мн сайтыг нийгэм олон нийтэд тулгамдаж буй асуудлыг төрд хүргэх чухал үүрэг гүйцэтгэж байгаа гэж ойлгож байна. Хэвлэл мэдээлэл бол дөрөв дэх засаглал, энэ үүргээ гүйцэтгэж байгаад манай төрийн байгууллага эмзэглэж болохгүй. Хэвлэл мэдээллийн гаргаж ирж байгаа асуудлыг яаж засах вэ, бид ямар алдаа гаргасан бэ гэж асуудалд хандах ёстой. Манайхан харин тэгэж хандахгүй, хувь хүнтэй нь, сэдэвтэй нь өөр талаас нь хараад байгаа юм. Сэтгүүлчийн ярьж байгаа асуудалд бодитой хандах ёстой. Миний хувьд найман ишигний асуудал дээр бага насны хүүхэдтэй эмэгтэй хүнд хорих ял өгч байна гэдэг бол бодох ёстой л асуудал гэж харж байгаа. Шүүхийн шийдвэрт нөлөөлөх гэж байгаа юм биш гэхдээ хувь хүний хувьд ингэж л бодож байна. Хэвлэл энэ асуудлыг хөндөж байгааг бид дараа дараагийн шатанд яаж засах вэ гэж харахгүйгээр шүүхэд нөлөөлөх гэдэг талаас харвал энэ буруу тийшээ явна. Нэг хэсэг төрийн байгууллага гаргаж ирж байгаа асуудлыг засъя гээд явж байгаа нөгөө хэсэг нь өөр өнцгөөс хараад байгаа юм. Аль болохоор бид хэвлэл мэдээллийн байгуллагын асуудлыг засах талаас явах ёстой л гэж хардаг"гэв.