Г.Занданшатар: Судалгаагаар “Хүүхдийн мөнгө авмааргүй байна” гэсэн үр дүн гарсан, хүүхдийн мөнгийг зорилтот бүлэгт олгоно

"Халамжаас хөдөлмөрт" хэлэлцүүлгийг өнөөдөр /2022.09.26/ Төрийн ордонд зохион байгууллаа. Хэлэлцүүлгийг нээж УИХ-ын дарга Г.Занданшатар үг хэллээ. 

Тэрбээр хэлсэн үгэндээ "Хөдөлмөрийн насны иргэн бүр өрх гэрээ авч явах, нийгэм эдийн засагт өөрийн хувь нэмрээ оруулах үүрэгтэй. Гэтэл өнгөрсөн хугацаанд нийгмийн олон төрлийн халамж хэт хавтгайрч, шүүмжлэл дагуулах болсон нь үнэн. Миний бие Дархан, Сэлэнгэ аймгуудад ажлаад ирлээ. Гэтэл очсон газар бүрт ажиллах хүчин дутагдсан байна. Тариан түрүүн дээр ажиллах тракторчин, комбайн, Дарханы нэхий үйлдвэрт бүрэн хүчин чадлаараа ажиллахад хэдэн зуун ажиллах хүчин хэрэгтэй атал ажиллах хүн олдохгүй байна. Нэг саяас 1,2 сая төгрөгийн цалинтай ажилд ажилтан авах гэхэд хүн ирэхгүй байгаа нь бодит үнэн.

ХНХЯ-ны судалгааны дүнгээр 2021 онд давхардсан тоогоор 2,5 сая иргэнд 72 төрлийн халамжийг олгосон байна. Ингэхэд 1,8 их наяд төгрөгийг зарцуулсан нь өнгөрөгч оны төсвийн зарцуулалтын 16 хувийг эзэлж байна. Эндээс бид хэрхэн популист шийдвэрүүдийг гаргадаг нь харагдаж байна. 

Тиймээс бид халамжийг зорилтот бүлэгтээ зориулах шаардлагатай байна. Удахгүй бид ирэх оны төсвөө батална. Ингэхдээ хүүхдийн мөнгийг 100 мянган төгрөгийг үргэлжлүүлэн олгох эсэхээ эргэж харах шаардлага зайлшгүй бий. Зөвхөн хүүхдийн мөнгө олгоход 1,5 их наяд төгрөг зарцуулж байна. Судалгаагаар ч хүүхдийн мөнгө авмааргүй байна гэсэн дүн гарсан. 

Түүнчлэн бид өрөөр халамжийг санхүүжүүлж байна. Тиймээс бид баялаг бүтээж, экспортод гаргадаг сектороо дэмжих хэрэгтэй. Мөн боловсролын салбарт шинэчлэлт хийх хэрэгцээ бий болсон байна. Цагийн ажлын хөлс, урамшуулал зэргийг оновчтой болгох зэргээр ажил эрхлэлтийн зохистой тэнцвэрийг бий болгох шаардлага ч бий. 

Хөдөлмөрийн насны 15-34 насныхны 11.6 хувь нь ажилгүй байгааг ажлын байр байхгүй байна гэж хэлэхээс илүүтэй ажиллах сонирхолгүй байна гэж харж байна" гэсэн юм.