Э.Одбаяр: АН хэрсүү байх ёстой

УИХ-ын гишүүн Э.Одбаяраас цаг үеийн асуудлаар тодрууллаа. 

Тэрээр, "Хамтарсан ЗГ-т томилогдож ажилласан манай найман сайд өнгөрсөн хугацаанд дор бүрдээ хичээж ажилласан.  Өчигдрийн МАН-ын бага хурлын үеэр хамтарч ЗГ байгуулсан намын бүлгийн гишүүд гэрээгээ удаа дараа зөрчсөн гэдэг тухай асуудал яригдсан гэж ойлгосон. Хамтарсан ЗГ байгуулах тухай гэрээнд тус тусын намын мөрийн хөтөлбөрт суусан тодорхой ажлуудыг яаж хэрхэн хэрэгжүүлэх вэ гэдэг үйл  ажиллагааны төлөвлөгөө тусгагдсанаас, нэгнийхээ алдаа дутагдалтай зүйлийг хараад загас шиг чимээгүй байх тухай асуудал тусгаагүй байсан.  Өөр ямар нэгэн шалтаг, шалтгаан байсан байх. Ямартай ч танхимын зарчим баримталж, ЗГ-т найман сайд маань ажилласан. Нөгөө талаас ард нь байх гишүүд дэмжигчдийн тоогоор АН, МАН зөрүү багатайгаар Монгол Улсын хүнд хэцүү цагт тулж явсан хоёр нам. 

Анх танхим бүрдэхдээ ЗГ-ын хэрэг эрхлэх газрын харьяад байсан Хяналт хэрэгжүүлэх газрыг, ЗГ-ын Хяналтын тухай хуулийн дагуу тусад нь бие даасан сайдтай болгож, миний бие ажилласан. Өнгөрсөн хугацаанд хуулиараа төрийн захиргааны төв байгууллага, төрийн өмчит компаниуд, нутгийн өөрөө удирдах байгууллагын хяналтыг манай хяналт шалгагч нар хийж хэрэгжүүлдэг. Энэ хугацаанд олон хүний эрх ашиг хөндөгдсөн байхыг үгүйсгэхгүй. 

АН одоо хэрсүү байх ёстой. Засаглалын тухай асуудал хөндөгдөх вий гэж болгоомжилж байна. Эрүүл зөв шүүмжлэл, хэлэлцүүлгүүдийг илүү их өрнүүлж ард түмнийхээ тусгалыг парламентын танхим руу оруулж ирэх ажлаа илүү түлхүү хийх шаардлагатай" гэв.