Ж.Амарсанаа: Манай бэр, хүү, ач нарын зургийг хүртэл гаргаад яриа өрнүүлээд байгаад би үнэхээр харамсаж байна

Тайландад болсон эмгэнэлт явдалтай холбоотойгоор элчин сайд А.Төмөрийн аав Ж.Амарсанаа "Өдрийн сонин"-д тайлбар мэдээлэл өглөө. Мэдээллийг бүрэн эхээр нь хүргэж байна. 

  Тэрбээр, “Та бүхний амгаланг айлтгая. Бидэнд тохиолдсон уй гашууг хуваалцаж байгаад талархаж байна. Би нэг зүйлийг онцгойлон хэлье гэж бодож байна. Манай бэр миний охиноос ялгаагүй хүүхэд миний хүүгийн эхнэр, миний ачийн ээж өөд болж тэнгэрт халилаа. Золгүй явдал тохиолдсон гэж би хэлмээр байна. Одоо Тайланд Улсын хууль шүүхийн байгууллагад энэ хэргийг шалгаж байгаа гэж ойлгосон. Асуудал дуусаагүй байна. Цаашид хуулийн хүрээнд албан ёсны шийдвэрүүд гарах байх гэж бодож байна. Одоо 49 хоног нь болоогүй байхад бид янз бүрийн мэдэгдэл хийж хүмүүсийн толгой тархийг эргүүлэх хэрэггүй гэж бодож байгаа. Гэхдээ зайлшгүй хэлэх шаардлагатай зүйл байна. Учир нь сүүлийн үед Фэйсбүүк болон хэвлэлээр буруутгасан янз бүрийн мэдээлэл гарч байна. Энэ мэдээллүүд нь дуу дуугаа авалцаад шэйрлээд дамжуулаад өгөөрэй гэх. Эдгээр мэдээлэлд хүлээцтэй, тайван ойлгож байгаач ээ гэж хэлэх гэсэн юм. Албан ёсны шийдвэр гараагүй байхад нийгмийг бужигнуулах шаардлагагүй гэж бодож байна. Манай бэр, хүү, ач нарын зургийг хүртэл гаргаад яриа өрнүүлээд байгаад би үнэхээр харамсаж байна. Тэр хүүхдүүд буруугүй шүү дээ. Жоохон хүүхдүүд. Миний зургийг хүртэл явуулж байгаа. Тэр яах вэ тэгээд байж л байх юм байгаа биз. Та бүхнийг хүлээцтэй, хүн чанартай, анхааралтай байж байгаач ээ л гэж хүсэх гэсэн юм” гэжээ.