​ “Цагаандэл Уул-Өлзий” боомт Монгол Улсын жишиг боомт болно

Монгол Улсын Засгийн газраас цар тахлын үеийн эдийн засгийг эрчимжүүлэх, эдийн засгийн тусгаар тогтнол, бие даасан байдлыг ханган бэхжүүлэх зорилго бүхий “Шинэ сэргэлтийн бодлого”-ыг эрчимжүүлэн ажиллаж байгаа.
Монгол улсын хувьд Өмнөговь аймаг дахь Цагаан дэлийн боомт нь олон улсын транзит тээвэр хийгээд экспортыг нэмэгдүүлэх гол гарц болох бөгөөд бөгөөд хоёр улсын жишиг боомт болгохоор талууд харилцан төлөвлөж, Бүгд Найрамдах Хятад Ард Улсын Өвөр Монголын Өөртөө Засах Орны Альшаа аймгийн 43 тэрбум төгрөгийн буцалтгүй тусламжаар бүтээн байгуулахаар болжээ.
Энэ талаар ЗТХ-ийн сайд Л.Халтар хэлэхдээ “Монгол Улс далайд гарцгүй орны хувьд боомтуудыг авто зам, төмөр зам, хурдны замаар цаг алдалгүй холбож, агаарын тээврийн салбарыг цоо шинэ шатанд гаргах зайлшгүй шаардлагатай. Боомтын хүчин чадлаар бид дэлхийн 160 улсаас 130-т эрэмбэлэгдэж байна. “Шинэ сэргэлтийн бодлого”-ын хүрээнд нийт 14 хилийн боомтыг авто замаар холбох ажил багтсан бөгөөд үүний нэг нь Цагаан дэлийн байнгын ажиллагаатай боомт юм” гэлээ.
Ийнхүү бүтээн байгуулалтын ажил эхэлснээр Өмнөговь аймгийн Ханхонгор сумын “Тавантолгой-Барууннаран” чиглэлийн чиглэлийн 32км авто замын төгсгөлөөс “Цагаандэл уул” боомт хүртэлх 270км замын дагууд нэг цэгт байгуулах үйлчилгээний цогцолбор байгуулахаар төлөвлөжээ. Үүнд
1. Замын хөдөлгөөний хяналт удирдлагын төв, шуурхай үйлчилгээний алба
2. Зам засвар арчлалтын төв
3. Авто засвар, граж
4. Бусад үйлчилгээний байгууламжууд /амрах талбай, дэлгүүр, халуун ус, ажилчдын байр, гүний худаг, зочид буудал, дугуй засвар бие засах газар г.м/
5. Авто зогсоолтой байна гэж заасан байна.
Ийнхүү хөгжлөө бодсон бүтээн байгуулалт эхэлснээр Монгол, Хятад хоёр улсын худалдаа, эдийн засгийн хамтын ажиллагаа сайжрах, нүүрсний экспорт, импортод шинэ гарц нээх, бүс нутгийн аялал жуулчлал хөгжих зэрэг олон талын ач холбогдолтой төдийгүй гадаад валютын урсгал ч мөн өсөн нэмэгдэх боломжууд бий гэдгийг харах хэрэгтэй болжээ.