ХЗДХ-ийн сайд Л.Мөнхбаатар “Эрх зүйн ба шүүх эрх мэдлийн шинэтгэл: Өнөөгийн байдал ба ойрын ирээдүй” ОУ-ын ЭШХ-д оролцов

Германы техникийн хамтын ажиллагааны нийгэмлэгээс Монгол Улсад дэмжлэг, туслалцаа үзүүлж ирсний 30 жилийн ойн арга хэмжээ өнөөдөр /2025.06.26/ боллоо. Түүхэн ойн хүрээнд “Эрх зүйн ба шүүх эрх мэдлийн шинэтгэл: Өнөөгийн байдал ба ойрын ирээдүй” сэдэвт олон улсын эрдэм шинжилгээний хурал болж, өнгөрсөн хугацаанд хоёр орны хамтын ажиллагаа хууль, эрх зүйн хүрээнд хийж хэрэгжүүлсэн ажлын үр дүн, ололт амжилт, цаашид хамтын ажиллагааг хэрхэн өргөжүүлэх чиглэлээр нийт 7 илтгэл хэлэлцүүллээ.

Ойн арга хэмжээнд Хууль зүй, дотоод хэргийн сайд Л.Мөнхбаатар оролцож үг хэллээ. Тэрээр Монгол Улсын Хууль зүй, дотоод хэргийн яамны нэрийн өмнөөс, ХБНГУ-ын Засгийн газар, ялангуяа Эдийн засгийн хамтын ажиллагаа ба хөгжлийн яаманд, 1995 оноос өнөөг хүртэл хууль зүйн салбарын шинэчлэлийг тууштай дэмжиж, хамтран ажиллаж ирсэнд онцгойлон талархаж байгаагаа илэрхийллээ.
Өнгөрсөн хугацаанд Германы техникийн хамтын ажиллагааны нийгэмлэг нь Монгол Улсын эрх зүйн шинэтгэлийг хийх, бэхжүүлэх, шүүх, хууль тогтоох байгууллагын чадавхыг сайжруулах зэрэг олон чиглэлд бодит үр дүн гаргаж, итгэлтэй, тогтвортой түншилж ирснийг тодотголоо.