БНСУ-ын Ерөнхийлөгч нөхцөл байдал хэвийн болбол Монгол Улсад айлчлахаа хэлжээ

Ерөнхийлөгч У.Хүрэлсүх өчигдөр БНСУ-ын Ерөнхийлөгч Мүн Жэ Ин-тэй  дээд түвшний цахим уулзалт хийж, хоёр улсын харилцаа “Стратегийн түншлэл”-ийн түвшинд хүрсэн тухай бид мэдээлсэн. 

Ерөнхийлөгч У.Хүрэлсүх Ерөнхий сайдаар ажиллаж байхдаа БНСУ-д айлчлах үеэрээ уулзсанаас хойш БНСУ-ын Ерөнхийлөгч Мүн Жэ Ин-тэй хоёр дахь удаагаа уулзсан нь энэ юм. 

Тэгвэл хоёр орны төрийн тэргүүн нарын уулзалтын талаар БНСУ-ын мэдээллийн топ сайтуудад онцлон мэдээлсэн байна. 

Тухайлбал, “news.nate.com” сайтад БНСУ-ын Ерөнхийлөгч нөхцөл байдал хэвийн болбол Монгол Улсад айлчлахаа илэрхийлсэн гэдгийг онцлон мэдээлжээ. 

Харин “hani.co.kr” сайтад “БНСУ-ын Ерөнхийлөгч Мүн: "Хойд Солонгосыг бүс нутгийн яриа хэлэлцээнд оролцуулахад чухал үүрэг гүйцэх улс бол Монгол байх болно гэж найдаж байна" хэмээн хэлснийг онцолжээ. 

“Etoday.co.kr” сайтад БНСУ, Монгол Улс нь “1990 онд дипломат харилцаа тогтоосноос хойш 30 жилийн хугацаанд хоёр улс - улс төр, эдийн засаг, соёл урлаг, боловсон хүчний солилцоо зэрэг төрөл бүрийн салбарт найрсаг, хамтын ажиллагааг хөгжүүлж ирсэнд талархаж байгаагаа илэрхийлээд "Стратегийн түншлэл" болгон сайжруулах талаар ярилцлаа” хэмээн мэдээлэв. 

Мөн “etnews.com” сайтад “БНСУ болон Монгол Улс эко орчныг бүрдүүлэх, технологийн дэвшилд хамтын ажиллагааг эрчимжүүлнэ. Монгол Улс эко хот, ухаалаг хот байгуулах, ложистикийн дэд бүтцийг бий болгоход хамтран ажиллана. Хоёр улсын харилцааг “Стратегийн түншлэл”-ийн түвшинд сайжруулан хөгжүүлэхээр тохиров” хэмээн дурдсан байна. 

Эх сурвалж:

https://www.hani.co.kr/arti/po...

https://www.etoday.co.kr/news/...

https://www.etnews.com/2021091...