Капитрон банкны Гүйцэтгэх захирлаар 2021 оны 7 дугаар сарын 23-ны өдрөөс эхлэн Батцэнгэлийн Үүрцайхбаатар томилогдлоо.

Б.Үүрцайхбаатар нь банк санхүүгийн салбарт 15 жил тогтвортой, тууштай ажилласан ба 2006-2007 онд Улаанбаатар хотын банканд Эдийн засагч 2007-2011 онд Чингис хаан банканд Эдийн засагч, 2011-2013 онд Чингис хаан банканд Цахим банкны ахлах мэргэжилтэн, 2013-2016 онд Чингис хаан банканд Хөрөнгө зохицуулалтын хэлтсийн захирал, 2016-2018 онд Капитрон банканд Гүйцэтгэх захирлын орлогч, 2018 оноос Бизнес хариуцсан дэд захирлаар тус тус ажилласан мэргэжлийн, туршлагатай банкир юм. Б.Үүрцайхбаатар СЭЗИС-ийг бакалавр зэрэг, Тайваний Шинжлэх Ухааны Их сургуульд магистрын зэрэг тус тус хамгаалжээ.

Капитрон Банкинд ажиллах хугацаандаа үүрэн холбооны үндэсний оператор “Жимобайл” ХХК-тай хамтран хөрөнгөөр баталгаажсан үнэт цаасыг Монголдоо анх удаа санаачлан гаргах, олон улсын санхүүгийн байгууллагуудаас хямд эх үүсвэр татах ажлуудыг зохион байгуулсны зэрэгцээ харилцагчдад тав тухтай үйлчилгээг хүргэхийг зорин банкны салбар тооцооны төвүүдийг шинээр нээж, жижиг, дунд бизнес эрхлэгчдийг дэмжсэн төслийн зээлүүд болон эко ногоон зээлийн бүтээгдэхүүнийг зах зээлд нэвтрүүлэн, бусад олон төсөл, хөтөлбөрүүдийг амжилттай хэрэгжүүлэн ажиллажээ.

Мөн дээрх хугацаанд Капитрон банкны бизнесийн өсөлтийг нэмэгдүүлэхэд томоохон хувь нэмэр оруулан ажилласан ба Капитрон банкны нийт актив өмнөх жилүүдтэй харьцуулахад 23.6 хувиар өсч, 1.1 их наяд төгрөг, нийт өөрийн хөрөнгө 121.7 тэрбум төгрөг, цэвэр ашиг 7.9 тэрбум төгрөгт хүрээд байна.

Монгол Улсын “ТОП-100 ААН”-ийн жагсаалтад сүүлийн таван жил дараалан амжилтаа ахиулаад буй тус банк нь энэ жил ТОП-100 ААН-ийн 30-д эрэмбэлэгдэж, банк санхүүгийн салбараас шалгарсан 6 банкны нэг болсон билээ. Мөн Монголбанкнаас тавьдаг бүх зохистой, шалгуур үзүүлэлтүүдийг ханган ажиллахын зэрэгцээ Капитрон банк нь өөрийн зээлжих зэрэглэлийн үнэлгээг олон улсын үнэлгээний Moody*s Investor Service агентлагаар хийлгэж, B3 тогтвортой үнэлгээг 3 жил дараалан хангаад байна.

Б.Үүрцайхбаатар захиралтай тус банкны мэргэжсэн 500 гаруй бүтээлч ажилтан, хамт олон нь энэ жил тохиож буй банкныхаа 20 жилийн ойгоо ололт, амжилтаар угтахын төлөө өөрийн мэдлэг чадвараа бүрэн дайчлан ажиллаж, Монгол Улсын эдийн засагт өөрийн хувь нэмрээ оруулахын зэрэгцээ, эрхэм харилцагч, үйлчлүүлэгчдийнхээ эрэлт хэрэгцээнд нийцүүлэн, бүтээгдэхүүн, үйлчилгээний чанарыг дээшлүүлж, нийгмийн хариуцлагын хүрээндэх төсөл, хөтөлбөрүүдээ улам бүр хүртээмжтэй хэрэгжүүлэхээр зорин ажиллаж байна.

Капитрон банкны нийт харилцагчид, үйлчлүүлэгчид, түншүүд болон Төлөөлөн Удирдах Зөвлөл, ажилтнуудын нэрийн өмнөөс Гүйцэтгэх захирлаар томилогдсон Б.Үүрцайхбаатар захиралд ажлын өндөр амжилт хүсье!

Капитрон банк - Ухаалаг ирээдүйн зүгт