Тэмээчин Н.Байгальмаагийн үхэлд 10 орчим иргэнээс мэдүүлэг авчээ

Тэмээчин Н.Байгалмаа өнгөрсөн 5-р сарын 15-ны өдөр зуурдаар таалал төгссөн билээ. Тэрбээр Налайх дүүргийн тавдугаар хороонд байрлах ээжийнхээ хашаанд гэртээ шатаж амиа алдсан харамсалтай хэрэг гарсан юм. Тухайн хэрэг явдалд Налайх дүүрэг дэх Цагдаагийн хэлтсээс хэрэг бүртгэлийн хэрэг нээн шалгаж байгаа юм. Хэргийн учир шалтгааныг тогтоох галын дүгнэлт одоогийн байдлаар  гараагүй байгаа аж. 

Талийгаачийн хавтаст хэрэгт  10 орчим хүнээс гэрчийн мэдүүлэг авчээ. Талийгаачийн ар гэрийнхэн тус хэрэгт иргэн Э.Цэрэндолгорыг сэжиглэж буйгаа мэдэгдээд түүнийг шалгаж өгөх хүсэлтийг Налайх дүүргийн цагдаагийн хэлтэс гаргасан байна. Энэ дагуу тус цагдаагийн байгууллагаас Э.Цэрэндолгорыг дуудаж мэдүүлэг авчээ.  Талийгаачийн Б-д холбогдох шүүх эмнэлгийн дүгнэлт гарсан бөгөөд угаарын хийгээс болж нас барсныг тогтоожээ. Улмаар талийгаач Б нь ганцаараа байсан бөгөөд хэргийн газраас түүний цогцос олдсон, өөр хүний цогцос гараагүй гэж албаны эх сурвалж мэдэгдлээ. Мөн талийгаач нь тухайн өдрөө гэртээ хүн цуглуулж, архидан согтуурсан байдал тогтоогдоогүй тухай албаны мэдээлэл байна. 

Талийгаач Б-ийн хөрш айлууд шөнө 00:00 цагийн орчимд бөөлөх чимээ гараад байсан гэж мэдүүлжээ. Мөн хэргийн газарт Эрүүгийн цагдаагийн газар, Нийслэлийн цагдаагийн газрын Онц хүнд гэмт хэрэгтэй тэмцэх газар,  Налайх дүүргийн цагдаагийн газар, Налайх дүүргийн онцгой байдлын хэлтсээс хамтарсан үзлэгийг хоёр дахин хийсэн байна. Ингэхэд шатсан гэрийн буйрнаас зул олдсон бөгөөд бөөгийн зан үйлээс зул асааж тухайн зул нь хадагтай авалцаж шатсан байх магадлалтай гэж албаныхан урьдчилж таамаглаж байгаа аж.