С.Ганбат генералын гэрээс 1 сая ам.доллар, улстөрчидтэй холбоотой нууц бичлэгүүд олджээ

Цагдаагийн харьяа дотоодын цэргийн штабын дарга, генерал С.Ганбатыг долдугаар сарын 5-ны үүрээр тагнуулаас саатуулж, 15 хоног цагдан хорих шүүхийн шийдвэр гарсан. Түүний гэрээс 1 сая ам.доллар, гүйцэтгэх ажлын техник хэрэгсэл, эрүүгийн цагдаагийн гүйцэтгэх ажлын маш нууц мэдээллүүд мөн улстөрчидтэй холбоотой нууц мэдээ, бичлэгүүд олдсон нь хамгийн их анхаарал татаж байгаа юм. Тиймээс түүнд Эрүүгийн хэрэг үүсгэж яллагдагчаар татсан.

Тэрбээр өнгөрөгч тавдугаар сард  экс Ерөнхийлөгч Х.Баттулгаас “Бригадын генерал” цол хүртсэн нь ч учиртай гэж улс төрийн хүрээнийхэн ярьдаг. Учир нь  цагдан хоригдож буй С.Ганбат нь Баянхонгорын аймгийнх. Энэ утгаараа Ерөнхийлөгч асан Х.Баттулга буухаасаа өмнө түүнд генерал цол олгожээ. Үүнээс гадна УИХ-ын дарга Г.Занданшатар генерал С.Ганбаттай тун ойр  юм байна. 

С.Ганбат нь  цагдаа, дотоодын цэргийн байгууллагаас төрсөн 16 дахь генерал юм. Тэрбээр цагдаа, дотоодын цэргийн байгууллагад тасралтгүй 35 жил ажиллаж буй. Тодруулбал, Эрүүгийн цагдаагийн газарт төлөөлөгчөөс авахуулаад, тасаг, хэлтсийн дарга, сүүлд Эрүүгийн цагдаагийн газрын даргаар хүртэл ажиллаж байсан мэргэжлийн эрүүгийн тагнуулын ажилтан юм.