Л.Баттөр: Нас баралт цаашдаа ч нэмэгдэх хандлагатай байна

ХӨСҮТ-ийн Ерөнхий захирал Л.Баттөрөөс коронавирусын улмаас нас барж буй иргэдийн өвчлөлийн талаархи мэдээллийг тодрууллаа. 

- Өнөөдрийн байдлаар хичнээн хүн коронавирусын халдвараар нас барсан бэ?

- 41 

- Нас барж буй иргэдийн нас болоод хүйсийн талаар мэдээлэл өгч болох уу? 

- Нас барж буй иргэдийн дундаж наслалт 67 байна. Хамгийн залуу нь 20 настай хөгжлийн бэрхшээлтэй иргэн байсан. Ерөнхийдөө нас барж буй иргэдийн дийлэнхи нь архаг хууч өвчтэй, настай хүмүүс байна. Тодруулбал хорт хавдартай, чихрийн шижинтэй, бронхиттой, элэгний хатууралтай, настай хүмүүс бий. Хүйсийн хувьд ойролцоо байна. 

- Яг коронавирусын халдвараас болоод нас барчихлаа гэдгийг эмнэлгийн орчинд тодорхойлж байгаа юу? 

- Өнөөдрийн нөхцөлд монгол улсад мөрдөгдөж буй хууль, дүрмийн хүрээнд коронавирусаар нас барсан иргэдийн шарилд задлан хийж болохгүй. Тиймээс яг коронавирусаар нас барлаа гэдгийг тогтоох боломжгүй. 

- Нас барсан иргэдийн чандарлаж байгаа юу? 

- Бид бие даан шийдвэрлэж тэг, ингэ гэж хэлэх боломжгүй. Харин ар гэрийнхэнд нь чандарлаж оршуулах талаар зөвлөмж өгч байгаа. 

- Одоо танай эмнэлэгт хичнээн хүн эмчлүүлж байна, тэдний биеийн байдал хэр байна вэ? 

-  ХӨСҮТ  280 ортой. Ор дүүрэн байна. 40 хүний биеийн байдал хүнд, 113 хүн хүндэвтэр,  100 гаруй өвчний биеийн байдал хөнгөн байна. 

- Нас баралт олон байна. Бууруулах боломж бий юу? 

- Нийт өвчилсөн иргэдийн 0,17 хувь нь нас барж байна. Энэ нь дэлхий нийттэй харьцуулахад бага. Бусад улс орнуудад халдвар авсан иргэдийн 2,5 хувь нас барж байгаа тоо баримтууд бий. Цаашдаа нас баралт өсөх хандлагатай байна. Учир нь коронавирусаар халдварласан иргэд 14-21 хоногт биеийн байдал хүндэрдэг. Өнөөдөр илрээд байгаа өвчтнүүд 14-21 хоногийн дараа биеийн байдал хүндэрдэрнэ гэж ойлгож болно.