МАН-ын удирдах зөвлөлийн хаалттай хуралдааны нээлттэй тэмдэглэл

Өнөөдөр буюу 2021 оны нэгдүгээр сарын 21-ний 09 цагт Засгийн газар ээлжит бусаар хуралдсан. Уг хуралдаанаар Ерөнхий сайд У.Хүрэлсүх Я.Содбаатар, Т.Мөнхсайхан нарыг чөлөөлөхгүй, кабинетаараа огцроно гэх мэдэгдлийг хийсэн. Түүний танхимд ажиллхж байгаа сайд нар гайхан хүлээн авсан ч тэдний саналыг сонсоогүй гэх мэдээлэл байна. Үүний дараа МАН-ын Удирдах зөвлөл 11 цагт Ерөнхий сайд У.Хүрэлсүхийн өрөөнд хуралдсан. Уг хуралд Удирдах зөвлөлийн 22 гишүүн оролцсон бөгөөд дөрвөн гишүүн үг хэлжээ. Тодруулбал УИХ-ын дарга асан М.Энхболд, Хуульзүйн сайд асан Ц.Нямдорж, Шадар сайд асан Ө.Энхтүвшин, Хотын дарга Д.Сумьяабазар нар үг хэлжээ. Ц.Нямдоржийн зүгээс хэн нэгний тоглолтод орж ЗГ-аа унагах хэрэг байгаа юу, нэг хүний хийсэн хариуцлагагүй ажил шүү дээ, сайн бодох хэрэгтэй. Цаашлаад талбай дээр л жагсаал болонгуут ЗГ нь огцроод байж болохгүй гэжээ. Харин М.Энхболдын зүгээс хэтэрхий яаруу шийдвэр бололтой, танхимынхаа сайд нартай зөвлөлдсөн эсэхийг тодруулсан байна. Мөн Д.Сумьяабазар, Ө.Энхтүвшин нарын зүгээс ахиж бодож үзэх хэрэгтэйг зөвлөжээ. Харин Ерөнхий сайд У.Хүрэлсүхийн зүгээс ийм байдалд хүрэхэд Монгол улсын Ерөнхийлөгч Х.Баттулга нөлөөлж байна, 100 жилийн ойгоо угтаад бид сонгуульд ялалт байгуулах ёстой, тэглээ ч хоёр сайдаа огцруулж өөрсдөө үлдэж болохгүй, би гаргасан шийдвэрээсээ ухрахгүй, санал хураахгүй гэжээ.