“Telegram” –ыг гурван өдрийн дотор 25 сая хүн суулгажээ

“Telegram” месенжерийг үүсгэн байгуулагч Павел Дуровөөрийнх нь бүтээгдэхүүний хэрэглэгчдийн тоо сүүлийн хэдэн өдөрт огцом нэмэгдсэн тухай мэдэгдэл хийжээ. Тэрээр өөрийн “Telegram” сувгаар ярихдаа хэрэглэгчдийн тоо огцом нэмэгдсэнийг дэлхийн түүхэн дэх хамгийн том тоон шилжилт хөдөлгөөн гэжээ.

 Тэрээр “Улс төрийн удирдагчид, олон тооны олон нийтийн байгууллагууд хуурамч мэдээлэл түгээхтэй тэмцэх, өөрсдийн бүлэг дундаа чухал мэдээллийн тухай мэдээлэл тараахдаа Telegram-ыг сонгон авч байгаа нь бидний хувьд нэр төрийн хэрэг” гээд Telegram нь олны санал бодлыг манлайлагчдын хувьд зорилтод бүлэгтэйгээ харилцах цор ганц найдвартай арга гэжээ. Нэгдүгээр сарын 12-оос хойш гурав хоногийн дотор Telegram 25 сая шинэ хэрэглэгчтэй болсон байна. 

 Трампыг “Twitter”, “Facebook’ зэрэг нийгмийн сүлжээнээс хөөсний дараа сая сая хэрэглэгчид ийнхүү Telegram-ыг сонгон авахыг дагаад зарим улс орын Ерөнхийлөгч, Ерөнхий сайд нар Telegram-д албан ёсоор бүртгүүлэн хаягаа нээжээ. Одоогоор “Telegram”-д Туркийн Ерөнхийлөгч Эрдоган, Бразилийн Ерөнхийлөгч Болсонару зэрэг хүмүүсээс эхлээд Мексик, Франц, Украин, Узбекистан, Тайваны Ерөнхийлөгч нар, Сингапур, Этиоп, Израилын Ерөнхий сайд нар бүртгэлтэй болсон байна.