Монголд болсон газар хөдлөлтөөс болж Тувад онц байдал зарлажээ

Өчигдөр Хөвсгөл нуурын орчим болсон 6,5 магнитудынхүчтэй газар хөдлөлт хил залгаа ОХУ-ын  зарим нутагт их хүчтэй мэдэгджээ.  Тухайлбал, Хөвсгөлийн орчим болсон газар хөдлөлтийн афтер шок буюу дагалдах хөдлөлтүүдээс болж Тувагийн зургаан районд онц байдал зарлажээ. Газар хөдлөлтийг Кызыл хот, Эрзин болон Каа-Хэмс, Тожин дүүргийн оршин суугчид нь хүчтэй мэдэрсэн гэж байна. 

 Буриадад 6 магниутын хүчтэй газар хөдлөлт мэдрэгдсэн.  Түүнчлэн Красноярскийн хязгаарын 27 дүүрэгт 4 магнитуд, 18 дүүрэгт 3 магнитудын хүчтэй газар хөдлөлт мэдрэгдсэн. 

 Эрхүү мужид 33 дагалдах газар хөдлөлт мэдрэгдэж, Эрхүү хотын найман байшинд цууралт үүссэн тухай мэдээлэл ирсэн байна. Мөн газар хөдлөлтийн үеэр  Эрхүүгийн усан цахилгаан станцын гидро цахилгаан үүсгүүрүүд 40 минут ослын зогсолт хийгээд ахин хэвийн ажиллаж эхэлсэн гэж байна. 

 Цаашлаад газар хөдлөлтийг Новосибиркс болон Томскмужийн оршин суугчид мэдэрчээ.

 Оросын ШУА-ийн Сибирийн салбарын Газрын мандлын судалгааны төвийн захирал Д.Гладкочуб нь Хөвсгөл нуурын орчим болсон газар хөдлөлтийн талаар “Байгалийн хагарлын бүс нутагт өнгөрсөн жилийн турш газрын өндөр идэвх ажиглагдсан бөгөөд энэ бүх газар хөдлөлтүүд хоорондоо холбоотой. Есдүгээр сард болсон болсон газар хөдлөлт нь арванхоёр ба нэгдүгээр сард болсон газар хөдлөлтийг үүсэх түлхэц өгсөн” гэсэн байна. Мөн Хөвсгөл нуур орчмын бүс нутаг багтаж байдаг Байгалийн хагарлын бүс нь газар хөдлөлтийн өндөр идэвхтэй гэдгийг онцолжээ.