Ариутгал халдвартгүйтгэлийн ажлыг хоёр цаг тутамд хийж байна

Байгаль орчин аялал жуулчлалын сайд Д.Сарангэрэл, Эрчим хүчний сайд Н.Тавинбэх нар Тавантолгой түлш ХХК-ийн баруун бүсйн үйлдвэрт ажиллаж эрчим хүчний үйлдвэр компаниудын ажлын байрны халдваргүйжүүлэлт, хамгаалалтын арга хэмжээг хэрхэн авч ажиллаж байгаатай биечлэн шалгалаа. Бүх нийтийн бэлэн байдалд шилжсэнтэй холбоотой Эрчим хүчний салбар өндөржүүлсэн зохион байгуулалтад шилжин ажиллаж байна. 0-12 настай хүүхэдтэй эх /ганц бие эцэг/-ийг болон технологийн ажиллагаанд шууд оролцохгүй албан хаагчдыг гэрээс нь ажиллуулж байгаа юм.

Эрчим хүчний сайд Н.Тавинбэх“Энэхүү онцгой дэглэмийн үед цахилгаан, дулааны эрчим хүчний хангамж болон сайжруулсан шахмал түлшний хангамж доголдох учиргүй. Үйлдвэрлэлийг явуулдаг гол хүчин зүйл нь болсон ажилчдын аюулгүй байдалд онцгой анхаарах учиртай. Бид шаардлагатай бүхий л арга хэмжээг авч ажиллаж байна. Эрчим хүчний салбар нарийн технологитой. Тийм учраас бид ажиллах хүчний нөөцийг хадгалах нь чухал” гэлээ.

БОАЖ-ын сайд Д.Сарангэрэл шалгалтын дараагаар“Өнөөдөр ажилласан байгууллагууд халдвараас урьдчилан сэргийлэх арга хэмжээг маш сайн авч ажиллаж байна. Ариутгагч бодис, бээлий, маск, нүдний шил, хамгаалалтын хувцас зэргээр хангасан. Түүнээс гадна хооллох дэглэмийг нарийн зохион байгуулжээ. Бөөнөөрөө хоолонд орохгүй. Ямар нэгэн байдлаар хоорондоо харьцахгүй байхаар тусгаарлалтыг хийж өгсөн байна. Энэ бүхнээс дүгнэхэд Эрчим хүчний салбар халдваргүйжүүлэлт, хамгаалалтын хатуу дэглэм тогтоож чадсан байна” гэв.

Тавантолгой түлш ХХК-ийн хувьд нэг ээлжинд 399 хүн ажиллахаас 395 хүн ажиллаж байна. Өглөө ээлж солигдоход ажилчдын биеийн халууныг хэмжиж, хоёр цаг тутамд ариутгалын ажлыг хийж байна. Мөн халуурсан, бие тавгүйтсэн хүн байвал тусгаарлах байрыг ч бий болгон ажиллаж байгаа юм.