Лос-Анжелесын түргэн тусламж хүчилтөрөгч хэмнэх горимд шилжинэ

Америкийн Лос-Анжелес тойргийн түргэн тусламжийн багуудыг өвчтөнүүдэд нэмэлтээр хүчилтөрөгч өгөхгүй байх, амьдрах магадлалгүй өвчтөнүүдийг эмнэлэгт хүргэхгүй байх зөвлөмж өгсөн тухай “Los Angeles Times” сонин мэдээлсэн байна.

 Тодруулбал, тус тойргийн яаралтай тусламжийн агентлаг нь түргэн тусламжийг багуудыг хэмнэлт гаргахын тулд цусны хүчилтөрөгчөөр баяжсан байдал буюу сатураци нь 90 хувь хүрэхгүй хүмүүст л хүчилтөрөгч өгч байх тухай шийдвэр гаргажээ. Үүний өмнө амьдрах  магадлал бараг үгүй болсон өвчтөнүүдийг эмнэлэгт хүргэж ирэхгүй байх тухай шийдвэр гаргаад байсан юм. Энэ шийдвэрийг дагуу яаралтай тусламжийн эмч нар хүнд өвчтөнд сэхээн амьдруулах ажилбарыг газар дээр хийгээд, зөвхөн судасны цохилт нь сэргэсний дараа л эмнэлэгт хүргэж байхаар болсон байна.

 Түүнчлэн корона вирусийн халдвар авсан хүмүүсийн ачааллыг дийлэхгүй байгаа тул ердийн нөхцөлд эмнэлэгт, ажиглалтад байх ёстой өвчтөнүүдийг хугацаанаас нь өмнө гаргадаг болсон байна. Одоо Зул сарын баяраар цар тахлын халдвар авсан хүмүүсийн давлагааг хүлээж байгаа тул, ойрын хэдэн долоо хоногтоо эмнэлгийн орны хүртээмжийн асуудал бүр хурцдаж магадгүй байгаа аж.

 Лос-Анжелес тойргийг багтаадаг Калифорни муж нь эмнэлгүүдийг хүчилтөрөгчөөр нэмж хангах баг байгуулж, түүндээ армийн инженерийн ангийн дэмжлэгийг авчээ. Лос-Анжелест одоогоор 827 мянга хүн халдвар авч, 10 мянга 850 хүн нас барж, эмнэлэгт 7,7 мянган хүн хэвтэж эмчлүүлж байна.