Хөл хориогоор хэтрүүлж уугаад нэрээ Селин Дион болгож өөрчилжээ

Алдарт дуучин Селин Дионы шүтэн бишрэгч Британи залуу хайртай одынхоо концертыг зурагтаар үзэж суухдаа архи хэтрүүлэн хэрэглэж согтоод нэрээ өөрчилсөн тухай “The Mirror” сонин бичсэн байна. Мань эр согтуудаа нэрээ өөрчилсөн гэдгээ ор тас мартсан байтал бүртгэлийн газраас мэдэгдэх хуудас ирж сануулжээ.

Зочид буудлын менежер хийдэг 30 настай залуу нэрээ яаж сольсноо ер санахгүй байгаагаа ойлгожээ. Гэвч ирсэн мэдэгдэх хуудас дээр түүнийг нэрээ өөрчилсний төлөө 89 фунт төлөөд, тус бүр нь 10 фунтын үнэтэй шинэ нэрийг баталгаажуулсан сертификат бүр найман ширхгийг захиалж мөнгө төлснийг нь бичсэн байж. Хамгийн сонирхолтой нь мань эр нэрээ Селин Дион болгож өөрчилснийг мэдэгдэх хуудас баталгаажуулсан байв. 

Шинэхэн Селин Дион нэрээ уншаа маш ихээр балмагдсан тухай “The Mirror” сонинд ярьжээ. Тэрээр “Би хөл хорионы үеэр зурагтаар олон live-концерт үзэж байсан. Тэгээд магадгүй Селиний нэг концертыг үзэх үеэр нэлээд хэдэн хундага татсаны дараа “мэргэн санаа” төрсөн бололтой” гэжээ. Мөн шинэ нэрээ олж мэдээд хамгийн түрүүнд компанийнхаа боловсон хүчний хэлтэс яаж ойлгуулах, мэйл хаягаа яаж солих вэ гэдэгт хамгийн их санаа зовсон юм байна. 

Мөн Селин нь “Ээждээ хэлтэл инээдтэй юм ер алга гэсэн. Тэгэхээр нь би бүр ч долоон дор юм болж, нэрээ Борис Жонсон болгон өөрчилж болох байсан ч аз болж тэр хүн амьд тоглолт хийдэггүй тухай тайлбарлаж өгсөн. Одоо ээж минь надтай хамт инээж сууна. Сэтгэлдээ Дион шиг дуулах гэж оролдож байсан ч түүний авьяасыг ч тэр, хэтэвчийг ч тэр өвлөж аваагүй л дээ” гэсэн байна.

Хамгийн хачирхалтай нь Томас Додд гэдэг нэрээ өөрчилж Селин Дион болгосон ч буцааж өөрчлөх сонирхолгүй гэдгээ “The Mirror” сонинд онцолжээ.