Их Британи “AstraZeneca” вакциныг зөвшөөрсөн анхны улс болов

Их Британийн Эмийн бэлдмэл, эмнэлгийн зориулалттай бүтээгдэхүүнийг зохицуулах агентлаг “MHRA” нь “AstraZeneca” компанийн корона вирусийн эсрэг вакциныг хэрэглэхийг зөвшөөрсөн анхны улс болсон байна. Зөвшөөрлийн дагуу уг вакциныг 18 ба түүнээс дээш насны хүмүүст хоёр тунг 4-12 долоо хоногийн зайтай хийхийг зөвшөөрчээ.

 Британийн Ерөнхий сайд Борис Жонсон үүнтэй холбогдуулан Твиттер  дээрээ “Энэ бол үнэхээр гайхалтай мэдээ, Британийн шинжлэх ухааны ялалт” гэж жиргэжээ.

 “AstraZeneca” компанийн гүйцэтгэх захирал “ВВС”-ийн радиод яриа өгөхдөө зөвшөөрлийг авсан болохоор маш богино хугацаанд долоо хоногт 1 сая тун үйлдвэрлэх хэмжээн хүрнэ гэжээ. Хамгийн гол нь энэ вакцин нь Британид анх илэрсэн мутацид орсон корона вирусийн эсрэг бодит нөлөөтэй юм байна. Вакцинжуулалтыг эрчимтэй явуулснаар 2021 оны эхний улирал дуусахад арваад сая хүнд хийнэ гэж тооцоолжээ. Засгийн газар нь “AstraZeneca” компаниас 100 сая тун худалдан авах гэрээ байгуулсан бөгөөд 2021 онд нийтдээ 3 тэрбум тун үйлдвэрлэхээр төлөвлөсөн байгаа аж.

 “AstraZeneca” компани нь COVID-19 –ийн эсрэг вакцинаа Оксфордын их сургуулийн хамтаар боловсруулжээ.