Швейцар дах карантинаас 400 жуулчин оргожээ

Швейцарын Вербье нэртэй уулын цанын амралтад гулгахаар Их Британиас ирээд хөл хорионд орсон 400 гаруй жуулчин оргож алга болсон тухай “Daily Telegraph” мэдээлсэн байна.

 Их Британийн Засгийн газар корона вирусийн илүү халдвартай хувилбар илэрсэн тухай мэдээсний дараанаас буюу энэ сарын 20-оос Швейцарын Засгийн газар нь Их Британиас нислэг хүлээж авахаа зогсоосон. Харин нислэг зогсоохоос өмнө Их Британиас ирсэн жуулчдыг 10 хоногийн турш сайн дураар хөл хорионд суух ёстой тухай тушаал гаргасан юм байна.

 Гэтэл арванхоёрдугаар сарын 27-ны өглөө Вербье амралт дах зочид буудлын эзэд Британийн жуулчид өглөөний хоолоо ч идэлгүй олноороо буудлаа орхин явж байгаа тухай мэдээлж эхэлжээ. Энэ тухай мэдээг ойшоогоогүй орон нутгийн удирдлага гэнэт “ухаан орж”, яаралтай шалгалт явуултал хөл хорионд сууж байх ёстой 420 британи жуулчин хорио цээрийг зөрчин Вербьег орхин явсан байж. Орон нутгийн захиргааг хөл хорионы дэглэм сахиулж чадсангүй гэж буруутгахад хүлээн зөвшөөрөөгүй байна. Улмаар эрүүл мэндийн төв байгууллага Британиас жуулчдын талаарх мэдээллийг хэт хожуу өгсөн тул ийм байдал үүссэн гэж буруутгажээ. Түүнчлэн Европ даяар хүмүүс бичиг баримтаа шалгуулалгүйгээр аялах боломжтой, хил дээр хатуу шалгалт гэхээр зүйл үгүй хүмүүсийг хянах боломжгүй байгааг онцолсон байна. Тухайлбал, зарим жуулчин Вербьегээс цаанаар явсаар хил даван Франц хүрч, тэндээ амарч байгаа гэсэн мэдээлэл байгаа аж. Харин зарим нь хэдийн Британид очоод, тэндээ сайн дураар хөл хорионд орсон байгаа аж.

Швейцарын хуулиар хөл хорионы дэглэм зөрчсөн хүнд 10 мянга хүртэлх швейцар франкийн торгууль ногдуулдаг юм байна.