АНУ-ын Конгресс иргэддээ 900 тэрбум долларын тусламж үзүүлэхээр шийдлээ

АНУ-ын Бүгд найрамдах нам ба Ардчилсан нам гэсэн гол хоёр намаас Конгресст сонгогдсон гишүүд иргэддээ 900 тэрбум долларын тусламж үзүүлэх тохиролцоонд хүрч чадсан байна. 

Америкийн гол хоёр нам нэгнээ үгүйсгэн хайр найргүй өрсөлддөг ч гэлээ цар тахлын үеэр иргэддээ мөнгөн тусламж үзүүлэх нь зүйтэй гэдэг дээр санал нийлж. “The New York Times” сонины мэдээлснээр тусламжийн шинэ багцад иргэн бүрд хүрэх буцалтгүй тусламж, ажилгүйдлийн тэтгэмж, бизнес эрхлэгчдэд зориулсан дэмжлэг, вакцинжуулалтад шаардлагатай хөрөнгө зэргийг багтаасан байна.

Ингэснээр АНУ-ын Төр нь түүхэндээ хамгийн том тусламжийг иргэддээ үзүүлэхээр боллоо. Гэвч энэ тусламжийг эдийн засгаа дэмжих зорилгоор 2,2 их наяд доллар зарцуулахаар заасан энэ оны гуравдугаар сарын хуульд заагдсан санхүүгийн төлөвлөгөөний талд нь ч хүрэхгүй байгаа аж.

“The Wall Street Journal” –д бичсэнээр энэхүү тусламжийн багцын дагуу жирийн иргэдэд үзүүлэх бэлэн мөнгөний хэмжээ 600 доллар, Холбооны Засгийн газраас олгодог ажилгүйдлийн тэтгэмжийг нэмэгдүүлэхэд долоо хоногт 300 доллар нэмж олгож байхаар болсон байна.