Энэтхэг Хятад хоёр дипломат харилцаа тогтоосны 70 жилийн ойн баяр тэмдэглэхээс татгалзав

Нью-Дели, Бээжин нь хоёр улсын хооронд дипломат харилцаа тогтоосны 70 жилийн ойг тохиолдуулан тус бүрдээ 35 баярын арга хэмжээ зохиох гэж байснаа цуцалсан  тухай “The Economic Times” сонин мэдээлжээ. Энэтхэгийн соёлын харилцаа хариуцсан зөвлөлийн Ерөнхий захирал Динеш Патнаик нь тус сонинд ярихдаа “Баярын арга хэмжээнүүдийг албан ёсоор бол цуцлаагүй. Гэхдээ COVID-19”-ийн тархалт, Ладакх дах Энэтхэг-Хятадын хил талууд цэргийн хүчээ зузаатгасан явдал нь баярын арга хэмжээг явуулахад нааштай нөлөөлөөгүй” гэсэн байна.

Уг нь ёслолын арга хэмжээний хүрээнд хоёр их гүрэн чуулга уулзалт зохион байгуулж, Энэтхэгийн Ерөнхий сайд Нарендра Моди Бээжинд айлчилж, БНХАУ-ын Тэргүүлэгч Си Жинпинтэй уулзах ёстой байжээ. Мөн тус тусын нутаг дээрээ “Гайхамшигтай Хятад орон”, “Итгэмээргүй Энэтхэг улс” гэсэн фото зургийн үзэсгэлэн, хөгжмийн болон бүжгийн их наадам, худалдааны яармаг, кино их наадам зохион байгуулахаар тохирсон байж.

Үүнээс гадна хоёр улсын хооронд дипломат харилцаа тогтоосны 70 жилийн ойгоор хамтарсан марк гаргах ёстой байсан ч Хятад нь шалтгаанаа тайлбарлалгүйгээр гаргахаас татгалзжээ.