Төрийн албан хаагчдыг гадаад банканд мөнгө хадгалахыг хориглов

Казахстаны Ерөнхийлөгч Касым-Жомарт Токаев нь авлигатай тэмцэх болон эрүүгийн шүүх дээр иргэдийн эрх зүйн хамгаалалтыг сайжруулахтай холбоотой нэмэлт болон өөрчлөлтүүдийг холбогдох хуулиудад оруулах тухай хуульд гарын үсэг зурсан тухай хэвлэлийн албанаас нь мэдээлжээ.

Шинэ хуулийн дагуу төрийн албан хаагчид, парламентын гишүүд болон шүүгчдийг гадаадын банкуудад данс нээх, үнэт зүйлс хадгалахыг хориглосон байна. Мөн авлигын хүнд ба онц хүнд хэргээр ял эдэлж байгаа хүмүүсийг хугацаанаас нь өмнө тэнсэн харгалзаж чөлөөлөхийг болиулжээ.

Цаашлаад эрүүгийн шүүхийн мэтгэлцэх боломж ба нээлттэй байдлыг нэмэгдүүлэх олон заалт орсон байна. Тухайлбал, шүүгчийг эрүүгийн зөрчлийн хамтран оролцогч аль нэг этгээдтэй холбоотой хэрэг дээр ажиллаж байсан бол түдгэлзүүлэх боломжтой болсон, мөрдөн байцаалтын үеэр шүүгчийн шийдвэрийг давж заалдах болон өөрчлөх үндэслэлийг өргөжүүлсэн байна.