​ Коронавирусийн эсрэг “Moderna” вакцины 400 мянган тунг устгажээ

Америкийн “Moderna” компани корона вирусийн эсрэг вакциныхаа 400 мянган тунг устгалд оруулсан тухай “Bloomberg” агентлаг мэдээлсэн байна. Харин тус агентлагт АНУ-ын Ерөнхийлөгчийн дэргэдэх вакцин боловсруулах талын зөвлөх Монсефа Слауи мэдэгджээ.

Үйлдвэрлэлийн эцсийн шатанд шүүлттэй холбоотой асуудал үүссэн учраас ийнхүү вакцинаа устгалд оруулсан, эдгээр 400 мянган тунг хуруу шилэнд савлаагүй байсан гэж мэдэгдсэн байна. Гэхдээ энэ хэрэг явдлыг үл харгалзан “Moderna” компани нь он дуусахаас өмнө 20 сая тун вакцин үйлдвэрлэнэ гэсэн төлөвлөгөөгөө хэрэгжүүлнэ гэжээ.

Үүний өмнөхөн Америкийн Хүнс ба эмийн бэлдмэлийн чанар хариуцсан удирдах газар буюу “FDA” нь “Moderna” компанийн боловсруулсан корона вирусийн эсрэг вакциныг хэрэглэхийг зөвшөөрсөн бөгөөд хэрэглэхдээ 18 нас хүрсэн хүмүүст хийхийг зөвлөсөн.

Түүнчлэн энэ сарын 13-нд Америкийн Өвчний хяналт ба урьдчилан сэргийлэлтийн холбооны төвүүдийн удирдлага нь АНУ-д “BioNTech” ба “Pfizer” компаниудын вакциныг онцгой тохиолдолд хэрэглэхийг зөвшөөрөөд байсан юм.