Америкийн тагнуулыг гурван орос хоригдлоор сольж магадгүй

ОХУ-д тагнуул хийсэн хэргээр 16 жил чанга дэглэмтэй хорих ял авсан АНУ-ын иргэн Пол Уиланыг Америкийн шоронд ял эдэлж байгаа ОХУ-ын иргэд болох зэвсгийн наймаачин Виктор Бут, хар тамхины наймаачин Константин Ярошенко болон бас нэг программистаар сольж магадгүй байгаа тухай “Интерфакс” мэдээлж байна.

Пол Уиланыг 2018 онд Москва дах “Метрополь” зочид буудалд Оросын маш нууцын зэрэглэлтэй мэдээлэл бүхий флаш дискийг хамтрагчаасаа авах үеэр нь сөрөг тагнуулынхан баривчилсан юм байна. Тэрээр өөрийгөө гэмгүй хүн, хэлмэгдсэн гэж үзсэн ч Оросын шүүхээс 16 жил чанга дэглэмтэй хорих ял онооход удахгүй солилцоогоор нутаг буцна гэж үзээд давж заалдаагүй байжээ.

Уиланы өмгөөлөгчийн мэдээлснээр БайденЕрөнхийлөгчөөр сонгогдсон тул үйлчлүүлэгчийг нь Америкийн шоронд байгаа Оросын иргэдээр солих магадлал эрс нэмэгдсэн, энэ талаар эрчимтэй хэлэлцээ явагдаж байгаа аж. Шинээр гарч ирсэн Ерөнхийлөгчид гадаадад ял эдэлж байгаа иргэдээ буцааж авах тал дээр шийдэмгий алхам хийж, өөрийгөө өмнөхөөсөө илүү гэдгээ харуулахын хүсдэг гэнэ.