АНУ “Умард урсгал-2”-ыг зогсоож дийлсэнгүй

ОХУ нь АНУ-ын янз бүрийн сүрдүүлэг, хориг арга хэмжээг үл тоон “Умард урсгал-2” хий дамжуулах хоолойгоо үргэлжлүүлэн угсарч эхэлсэн тухай “Bloomberg” мэдээлж байна. Германы мэдлийн усанд оросын хоолой угсрагч усан онгоцнууд ажлаа эхлүүлжээ. Одоогоор Оросын “Фортуна” нэртэй хоолой угсрагч усан онгоц 2,6 км урттай төгсгөл хэсгийг угсрах ажлыг дуусгаж байна. 

Оросыг байгалийг шатдаг хий дамжуулах хоолой угсрах ажлыг өнгөрсөн жил дуусгах ёстой байсан ч ажилд хамтран оролцсон Европын компаниудын эсрэг АНУ санхүүгийн хориг арга хэмжээ авахаар сүрдүүлсний дараа түр зогсоод байсан юм. Түүнчлэн Оросын сөрөг хүчний удирдагч гэгддэг А.Навальныйг химийн хороор хордуулсан тухай мэдээ тармагц сөрөг хүчнээ хордуулдаг Оросын Засгийн газрын төслийг хаах ёстой гэж Германы эрх баригчдад нэг хэсэг шахалт үзүүлсэн ч үр дүнд хүрч чадсангүй.

Оросыг угсралтын ажлаа эхлүүлсэн сургаар Вашингтон “Умард урсгал-2”-ын эсрэг нэмэлт хориг арга хэмжээ авахаар зэхэж байна. АНУ нь хий дамжуулах бас нэг хоолой ашиглалтад орвол Орос нь Европт хэтэрхий их нөлөө үзүүлэх болно, ардчилалд аюул учирна гэж тайлбарлаж байгаа. Гэвч үнэн хэрэг дээрээ АНУ нь өөрийн нутаг дээр олборлосон занарын шатдаг хийгээ Европт борлуулах арга хайж байна гэдэгт дийлэнх шинжээчид санал нийлсэн. Оросоос хямд үнэтэй байгалийн шатдаг хий авч байгаа цагт Европын орнууд өндөр үнээр АНУ-аас шингэрүүлсэн шатдаг хий худалдаж авахгүй нь ойлгомжтой тул дамжуулах хоолойг хүчтэй эсэргүүцсэн ч ийнхүү тусыг олоогүй бололтой.