Хамгийн олон сэтгүүлчийг хорьсон жил болжээ

2020 оны арванхоёрдугаар сарын байдлаар дэлхийн хэмжээнд 274 сэтгүүлчийг хорьж саатуулаад байгаа тухай Нью-Йоркт байрладаг “Сэтгүүлчдийг хамгаалах хороо” мэдээлсэн байна. Үүнээс өмнө 2016 онд 272 сэтгүүлч хоригдож дээд амжилт тогтоож байсан аж. Тус хорооноос гаргасан тоо ёсоор хоригдсон эрэгтэй сэтгүүлчдийн тоо сүүлийн таван жил 250-аас дээш гарсаар ирсэн бол хоригдсон эмэгтэй сэтгүүлчдийн эзлэх хувь 13 хувь байна.

Хоригдсон сэтгүүлчдийн 2/3 нь хориотой байгууллагуудтай хамтран ажилласан, алан хядлагыг дэмжсэн гэх мэт төрийн эсрэг гэмт хэрэг буруутгагдаад байгаа юм байна. Ингээд зогсохгүй хоригдож байгаа сэтгүүлчдийн 19 хувьд нь ямар нэг шийтгэл тулгалгүй шууд баривчилсан бөгөөд ийм тохиолдлын дийлэнх нь Саудын Арави, Эритрей улсуудад ногдож байгаа аж. Түүнчлэн 2020 оны байдлаар хоригдож байсан хоёр сэтгүүлч корона вирусийн халдвараар нас барсан байна.

“Сэтгүүлчдийг хамгаалах хороо” нь энэ мэдээллийг мягмар гарагт олон нийтэд тараасан бол үүнээс нэг өдрийн өмнө “Хил хязгааргүй сурвалжлагч нар” байгууллагаас сэтгүүлчдийг бодит үндэслэлгүйгээр хорьж саатуулсан тухай арай өөр мэдээ тараасан байсан. “Хил хязгааргүй сурвалжлагч нар” байгууллагын мэдээгээр энэ оны арванхоёрдугаар сарын байдлаар 387 сэтгүүлч хоригдсон, саатуулагдсан байдалтай байна. Мөн энэ оны хоёрдугаар сараас арван нэгдүгээр сарын хооронд цар тахалтай холбоотой үйл явдлыг хэвлэл мэдээллээр харуулснаас болж сэтгүүлч, сурвалжлагчийг саатуулсан 300 гаруй тохиолдол бүртгэгдсэн, тэднээс 14 нь одоо ч шоронд хоригдож байна. Коронавирусийн тархалтыг хязгаарлах зорилгоор дэлхийн дийлэнх улс оронд хэрэгжүүлж байгаа хууль, урам нь сэтгүүлч хүний мэдээлэл цуглуулах боломжийг хязгаарлаж байна гэж “Хил хязгааргүй сурвалжлагч нар” байгууллага үзсэн байна.