Оросын “Спутник V” вакцин хоёр жилийн хугацаанд үйлчилнэ

Оросын “Спутник V” вакциныг үйлдвэрлэгч нь өөрийн вакцины үйлчлэх хугацааг олон нийтэл ил болгожээ. Вакциныг бүтээсэн Гамалейн нэрэмжит төвийн тэргүүн Александр Гинцбург нь ТВ нэвтрүүлэгт орох үеэр вакциныг ойролцоогоор хоёр жилийн хугацаанд вирусээс хамгаалахаар тооцогдсон гэж ярьжээ. Харьцуулахад “Спутник V” вакцины гол өрсөлдөгч гэгдэж байгаа Pfizer вакцин нь 4-5 сар л үйлчлэх хугацаатай юм байна.

ОХУ-д одоогоор 150 мянган хүн “Спутник V” вакцин хийлгээд байгаа юм байна. Мөн ОХУ нь “Спутник V”-ээс гадна “ЭпиВакКорона” нэртэй бас нэг вакцин бүртгүүлээд байгаа бөгөөд түүнээ удахгүй иргэдэд тарихаар том хотууд руу явуулсан аж.

АНУ нь дээр дурдагдсан “Pfizer/BioNTech” вакцинаас гадна “Moderna” нэртэй бас нэг вакцин бүртгүүлээд туршиж байгаа. Энэ сарын арванд “Moderna” вакцины туршилтын хоёр дах шатанд шилжиж, өсвөр насны хүүхдүүд дээр туршиж эхэлсэн тухай мэдээлж байсан.