Ц.Оюунгэрэл: Ковидын үед айлын хаалган дээр наалт наадаг 15-р зууны аргаасаа ихэнхи орнууд татгалзаж байна

КОВИД-19 дэлхий даяар гарч эхэлж байх үед хамгийн ноцтой хүний эрхийн зөрчил нь ялгаварлан гадуурхалт, нийгмээс адлах явдал байсан. Ази хүмүүсийг Европт ялгаварлан гадуурхаж энэ зөрчил эхэлж байв.

Дараагийн нэг том хүний эрхийн зөрчил нь Италид олон хүн зэрэг өвчилж байх үед хүмүүсийг насаар ялгавларлан гадуурхаж, ахмад настныг эмчлэхгүй, эмнэлгийн  тусламж үйлчилгээ авах эрхийг нь бүдүүлгээр зөрчиж, зөвхөн залуусыг эмчилж байсан нь сүүлийн үед дэлхийд үзэгдээгүй том зөрчил болж байлаа.

Одоо ч дэлхий даяар КОВИД-той холбоотой хүний эрхийн олон зөрчил гарсаар байна.

Манай улсын хувьд хувь хүний нууцын тухай хуулиар онц халдварт өвчнөөс бусад үед хүний эрүүл мэндийн мэдээлэл хувийн нууцад хамаардаг. Гэхдээ энэ нь онц халдварт өвчний үед хувь  хүний нууц, эрхийг дуртайгаараа зөрчиж болно гэсэн үг биш. Эрүүл мэндийн мэдээллийг ил цацах, нууц биш байлгах хоёр бол тэс өөр асуудал.

Ил цацна гэдэг бол тухайн хувь хүний орон гэрийн халдашгүй байдал, хувь хүний болон гэр бүлийн нэр төр, аюулгүй байдал, бусдад ялгаварлан гадуурхагдахаас хамгаалахтай холбогддог учраас төр үүнд болгоомжтой хандах ёстой байдаг.

Нууц биш байлгана гэдэг нь дээрх бүх хувь хүний эрх, эрх чөлөөг хүндэтгэхийн хажуугаар нийгмийн эрүүл мэнд талаасаа аюулгүй орчин үүсгэх шийдлийг олно гэсэн үг.

Ихэнх орнууд КОВИД-ын үед айлын хаалган дээр албадан журмаар бичиг наадаг 15р зууны аргаас татгалзаж байна. Харин хувь хүн, гэр бүлүүд өөрсдөө уламжлалт аргаараа дээс татах, эсвэл манайх зочин хүлээж авахгүй уучлаарай гэх мэтийн бичиг нааж болно. Албадан аргаар бичиг нааснаас болж хүүхдийн эрх зөрчигдөж байгаад хамгийн их харамсаж байна.