А.Амбасэлмаа: Төмөр замаар дамжин халдвар тархаж байж болзошгүй

УОК хуралдаанаар хэлэлцсэн асуудлыг танилцуулж байна. ХӨСҮТ-ийн тандалт судалгааны хэлтсийн дарга А.Амбасэлмаа “Улсын хил дотор батлагдсан 22 тохиолдол байна. Голомт гараад байгаа мэтээр ойлголт нийгэмд үүсээд байна. Хоёр шинэ голомт нь Улаанбаатар, Сэлэнгэд байгаа. Улаанбаатар хотод энэ сарын 10-наас анхны тохиолдол илэрсэн. Ойрын хавьтлын 445 хүнийг илрүүлэн шинжилгээнд хамруулсан. Анхны болон давтан шинжилгээгээр вирус илэрч, батлагдсан 10 тохиолдол байна. Ихэнх нь ойрын хавьтал болсон. Харин дам хавьтлын 5000 гаруй иргэнээс вирус илрээгүй. 

         Сэлэнгэ аймагт батлагдсан тохиолдол дөрвөн байна. Улаанбаатар хотод батлагдсан тохиолдолтой нэг голомт биш. Сүүлийн үед ОХУ-д халдвар нэмэгдсэн учраас магадгүй боомтоор вирус дамжиж, шинэ голомт үүсэж байна гэж мэргэжлийн байгууллагынхан харж байна. Үүний хүрээнд хариу арга хэмжээ авах ажил үргэлжилж байна. Сэлэнгэ аймгийн класстер өвчлөлтэй холбоотой Дархан-Уул аймагт дахин нэг тохиолдол бүртгэгдсэн. Төмөр зам, ачаа тээвэртэй холбоотой халдвар үүсэж байгаа гэж тооцоолж байна. Иймд Сэлэнгэ аймгийн бүх иргэнийг шинжилгээнд хамруулах ажлыг эхлүүллээ” гэв.