ЗТХЯ-ны ТНБД-аар ажиллаж байсан Б.Артурын хамаарал бүхий төрийн бус байгууллага төсвөөс 236 сая төгрөг авчээ

УИХ-ын тамгийн газар 2020 онд 161 төрийн бус байгууллагтай 2 тэрбум 727 сая төгрөгийн гэрээ хийснийг бид “Төсвийг мөшгөе” нэвтрүүлгээр онцолсон. Тэдний нэг буюу төсвөөс хамгийн их мөнгө авсан төрийн бус байгууллага бол Нийгмийн маркетингийн бодлого, судалгааны хүрээлэн. Тус төрийн бус байгууллага УИХ-ын тамгын газартай нийт 236 000 000 төгрөгийн гэрээ хийсэн байдаг. Ингэхдээ,

1 дүгээр сард хоёр удаагийн гүйлгээгээр 50 000 000 төгрөг,

2 дугаар сард 22 500 000,

3 дугаар сард гурван удаагийн гүйлгээгээр 63 500 000,

5 дугаар сард хоёр удаагийн гүйлгээгээр 50 750 000,

7 дугаар сард хоёр удаагийн гүйлгээгээр 50 000 000 төгрөгийг тус тус авчээ.

8222894 регистерийн дугаартай Нийгмийн маркетингийн бодлого, судалгааны хүрээлэн төрийн бус байгууллага нь 2016 онд байгуулагдсан бөгөөд Удирдах зөвлөлийн дарга нь Банзрагчийн Золжаргал, гишүүнээр Батжаргалын Сүхбат бүртгэлтэй байна. Б.Золжаргал нь ЗТХЯ-ны Төрийн нарийн бичгийн даргаар ажиллаж байсан Б.Артурын гэр бүлийн хүн юм. Төрийн өндөр дээд албан тушаал болоод танил талаа ашиглан их хэмжээний мөнгийг татвараас зайлсхийн төрийн бус байгууллагаар угааж буй үйлдэл үргэлжилнэ.