Хөнгөлөлттэй эмийг шинэчилсэн журмаар олгож эхэлсэнтэй холбоотойгоор системд ачаалал үүсчээ

Эрүүл мэндийн даатгалын байгууллагаас жор бичиж эрхтэй эмч нарыг A, B, C гэж ангилжээ. Энэ нь эмийн замбараагүй хэрэглээг хянах боломжтой зохицуулалт юм. Өөрөөр хэлбэл, анхан шатны эмч нарын бичих эм, хоёр, гурав дугаар шатны эмч нарын бичих эмийг тус, тусд нь ангилсан байна. Тухайлбал, өрхийн эрүүл мэндийн төв дээр эмчлэгдэх боломжгүй болон нарийн шинжилгээ хийх шаардлагатай өвчтөнд шинжилгээний хариу гарсны дараа хэрэгтэй эмийг нь олгох аж.

Түүнчлэн энэ жилээс хөнгөлөлттэй эм олгохдоо цахим систем ашиглаж, хурууны хээгээр бүртгэдэг болжээ. Энэ нь бусдын регистрийн дугаар дээр жор бичүүлж, эм авах эрсдэлээс сэргийлж буй аж. Санхүүгийн хязгаарлалтгүй болсон учир хэрэв ийм зохицуулалт хийхгүй бол Эрүүл мэндийн даатгалын сан алдагдалд орох эрсдэлтэй болохыг тус байгууллагаас мэдээллээ. Харин хурууны хээгээ бүртгүүлэх боломжгүй, гэртээ эмчилгээ хийлгэдэг иргэд өрхийн эрүүл мэндийн төвд мэдээллээ өгөх хэрэгтэй аж. Одоогоор Өрхийн эрүүл мэндийн төв дээр 19 мянга 600 орчим хуруугаа уншуулах боломжгүй иргэдийн мэдээлэл ирсэн байна.