Гурав хоногийн дотор есөн хүнээс коронавирус илэрч, нийт батлагдсан тохиолдол 349 боллоо

Эрүүл мэндийн яамнаас коронавируст цар тахлын нөхцөл байдлын талаар ээлжит мэдээлэл хүргэхэд гурав хоногийн дотор нийтдээ есөн хүнээс халдвар илэрсэн талаар мэдээллээ.

Тодруулбал аравдугаар сарын 22-ний өдөр Алтанбулгаас ирж тусгаарлагдсан 21-64 насны гурван жолоочоос халдвар илэрсэн байна. Эдгээрийн нэг нь ОХУ-ын харьяат иргэн аж. Түүнчлэн аравдугаар сарын 28-ний өдөр Токио-Улаанбаатарын нислэгээр ирсэн 27 настай эмэгтэйгээс халдвар илэрчээ.

Алтанбулгийн боомтоор орж ирсэн ачаа тээврийн таван жолоочоос мөн адил коронавируст халдвар илэрчээ. Эдгээрийн нэг нь ОХУ-ын харьяат иргэн эзэлж байгаа аж.

Ингэснээр Монгол Улсад зөөвөрлөгдөн орж ирж батлагдсан нийт тохиолдол 349 боллоо үүнээс 313 нь эдгэрээд байна. Эдгэрэлтийн түвшин 90 хувьтай байна.

ХӨСҮТ-ийн клиникт 36 хүн эмчлэгдэж байгаагаас найман хүний биеийн байдал хүндэвтэр байгаа аж. Одоогоор 63 хүн ажиглалт, эмчлэгдэж байна.