Зариг: Д.Гэрэлийг АТГ-т шалгуулж, хүү Г.Аранзалын алтны уурхайн лицензийг цуцлуулна

Зариг.мн сайт,  Тагнуулын Ерөнхий газрын дарга асан Генерал Д.Гэрэл нарын хагас жил орчмын  маргааныг Сүхбаатар, Чингэлтэй дүүргийн Иргэний хэргийн шүүх тасаллаа.

 Д.Гэрэл нь Зариг.мн сайтад долоон үйл баримтаар гомдож шүүхэд нэр төрөө сэргээлгэхээр Д.Гэрэлийн зүгээс  нэхэмжлэл гаргасан. Тэгвэл тус дүүргийн Иргэний  хэргийн шүүхээс зургаан хүсэлтийг хэрэгсэхгүй болгож, нэг гомдлыг нь хангаж шийджээ. Тагнуулын дарга Д.Гэрэл нь төрсөн хүү Г.Аранзалын нэр дээр байдаг "Пенттерра"  ХХК-ийг хөрөнгө орлогынхоо мэдүүлэгт дурдаагүй байна.  Мөн 2020 оны зургаадугаар сарын 10-нд Сэлэнгэ аймгийн Мандал сум дахь сум дундын шүүхээс Д.Гэрэлийн хүү Г.Аранзалын уурхайд үзлэг хийгээд "Нарангийн голын эргээс 14 алхам орчмын" зайд байгааг үзлэгээрээ тогтоосон юм. Энэ нь "урт нэртэй" хуулийн зүйл заалтыг зөрчиж байна. Тиймээс Зариг.мн сайтын зүгээс Ашигт малтмал, газрын тосны газарт тус алтны уурхайн ашиглалтын тусгай зөвшөөрлийг цуцлах хүсэлтийг хүргүүлж байна. 

Зариг.мн сайтын сэтгүүлч Н.Өнөрцэцэг:

 -ТЕГ-ын дарга асан генерал Д.Гэрэл 2020 оны хоёрдугаар сарын 20-ны өдөр Зариг.мн сайтад хандан, “Миний нэр төрд халдаж байна” гэх өргөдөл өгсөн. Бүтэн 10 сар хэрэгтэйгээ танилцаж, нэмэлт материал бүрдүүлэх, шүүхийн үзлэг хийлгэх, хэргийн материалтай танилцах гээд Д.Гэрэлтэй зууралдлаа. Зөвхөн хууль хяналтын байгууллагаар асуудал зогсоогүй. Д.Гэрэлийн шахалт дарамт, аливаа нөлөөлөл, янз бүрийн зүйл тулгарсан. Сэтгүүлчид өөрсдийнхөө төлөө мэдээ бэлтгэдэггүй юм. Бид нийтийн эрх ашгийн төлөө дуугардаг. Байгаль орчны төлөө дуугарсан.

Д.Гэрэлийн хүү нь уурхайтай. Тэр нь Сэлэнгэ аймгийн Баянгол сумын нутагт ажилладаг. Тэр уурхайн ойр орчмын малчид долоон км-ын цаанаас усаа авч уудаг. Мал нь хавар хээл хаядаг. Бүрэн төл гаргадаг ч үхсэн төл байдаг гэж малчид гомдоллодог юм аа. Тиймээс бид байгаль орчин сүйдэж байгаа асуудалд байж болохгүй асуудал гэж үзээд асуудлыг дэвшүүлсэн. Иймээс бид бэлтгэсэн мэдээ сурвалжилгаа шүүх хүртэл нь явж хамгааллаа. Одоо хуулийн байгууллага ажиллах цаг болсон. Түүний хүүгийн уурхай бүх нийтийн шалгалт явагдаж байхад ганцаараа шалгуулаагүй. Тухайн уурхайд 21 настай залуу хүний амь эрсэдсэн байхад яагаад хариуцлага тооцогддоггүй юм бэ. Голоос 14 алхмын зайтай уурхай ажиллаж байна. Тиймээс энэ уурхайн холбогдох лицензийг хууль хяналтын байгууллага болоод ашигт малтмал, газрын тосны газрынхан анхааралдаа авч шалгана уу. гэлээ"