Эрдэнэт үйлдвэрийн онцгой дэглэм ирэх долоо хоногт дуусна

Эрдэнэт үйлдвэрийн 49 хувьтай холбоотой маргаан дэгдэж 2019 оны 3-р сард Монгол улсын Засгийн газар тус үйлдвэрт онцгой дэглэм тогтоосон. Үйл ажиллагааг нь шалгах ажлын хэсэг байгуулагдаж, онцгой дэглэмийн хугацааг хэд хэдэн удаа сунгасан. Удахгүй онцгой дэглэмийн хугацаа ирэх долоо хоногт дуусна. Гэхдээ дахиж сунгах шалтгаан байхгүй гэж Засгийн Газрын Хэрэг Эрхлэх Газрын дарга  Л.Оюун-Эрдэнэ мэдэгдлээ.

Эрдэнэт үйлдвэрийн 49 хувьтай холбоотой асуудлыг шалгах ажлын хэсгийг Засгийн газрын хэрэг эрхлэх газрын дарга Л.Оюун-Эрдэнэ ахалж байсан. Тус ажлын хэсэг 49 хувийг худалдаж авсан санхүүгийн эх үүсвэрийг тодорхой болгосон гэв.

Эрдэнэт үйлдвэрт онцгой дэлгэм тогтоосноос хойш тус үйлдвэрийн улсад төлдөг татвар эрс нэмэгдсэн гэж ажлын хэсгийн ахлагч мэдэгдлээ. Тодруулбал жилд 350-450 тэрбум төгрөгийг төсөвт төвлөрүүлдэг байсан бол одоо 1 их наяд гаруй төгрөгийг төсөвт төвлөрүүлж байгаа гэв.

Энэ асуудлыг шалгахын тулд шинээр ажлын хэсэг байгуулсан. Шадар сайд Я.Содбаатар, Ерөнхий сайдын ахлах зөвлөх Ж.Энхбаяр тэргүүтэй ажлын хэсэг асуудлыг эцэслэн тогтооно гэв.