Г.Аранзал Арцатын аманд байдаг ээжийнхээ газрыг яаж томруулснаа хариулсангүй

ТЕГ-ын дарга генерал Д.Гэрэлийн эхнэр Э.Даваасүрэн Богд уулын Арцатын аманд газар эзэмшдэг талаар түүний хүү Г.Аранзал тайлбар хийжээ. Тэрбээр, “Тухайн газрыг ашиглах эрхийг одоогоос 16 жилийн өмнө буюу 2004 онд миний ээж Э.Даваасүрэнгийн эзэмшлийн “Ойрад импекс” ХХК-д холбогдох хууль журмын дагуу олгосон байдаг. 

 Түүнээс миний эцэг ТЕГ-ын дарга болоод гэнэт өнөөдөр гараад ирсэн юм биш. Аавын хөрөнгө орлогын мэдүүлэг дээр ч байгаа. Тухайн газарт цэцэрлэгт хүрээлэн барихаар санхүүжилтийн ажил нь бага багаар хийгдээд явж байгаа.Надад хүмүүсийн хэлдэг шиг оффшор данс байхгүй, төрийн тендерт оролцож байгаагүй. Мөнгө хүүлэх болон уул уурхайн чиглэлээр үйл ажиллагаа явуулж байгаагүй” гэжээ. 

Асуудлын гол нь тухайн 0.5 га газар дээр 1.79 га газрыг БОАЖ-н сайд Н.Цэрэнбатын гарын үсгээр нэмж олгосон баримт байдаг. Үүнийг сэтгүүлч асуусан ч тодорхой хариулт хэлээгүй байна. Энэ нь 0.5 га газрыг 1.79 га-гаар нэмэгдүүлэхэд албан тушаалтан Д.Гэрэл нөлөөлсөн гэж хардах үндэслэл болж байгаа юм.