Б.Батзоригийн араас “явах” дөрвөн гишүүний зам шуударсан уу

УИХ-ын хаврын чуулган өнөөдөр нээлтээ хийнэ. Чуулган нэлээд ширүүхэн эхэлж, үйл явдал өрнөх бололтой. Учир нь УИХ-ын гишүүн Б.Батзориг гишүүний бүрэн эрхээсээ чөлөөлөгдөх өргөдлөө өнгөрсөн баасан гарагт УИХ-ын даргад өгсөн.

Ингэснээр ЖДҮХС-ийн луйвартай нэр холбогдсон гишүүдийн байдал хөндөгдөж, асуудал сөхөгдөх нэг шалтгаан болж байгаа юм.

Жижиг дунд үйлдвэрийг хөгжүүлэх сангийн зээлийг албан тушаалаа ашиглан өөрийн хамаарал бүхий этгээд, түүний байгууллагад олгосон шалтгаанд УИХ-ын 40 гаруй гишүүн нэр холбогдсон. Тэднээс дөрвөн гишүүнд холбогдох асуудлыг мөрдөн шалгах байгууллагаас гэмт хэрэг гэж үзээд, гишүүний бүрэн эрхийг нь түдгэлзүүлж, яллагдагчаар татах саналыг гаргаж байсан. Тодруулбал, ЖДҮХС-аас  зээл авсан гэх УИХ-ын гишүүн Л.Энхболд, Б.Ундармаа, Г.Солтан, Д.Дамба-Очир нарын УИХ-ын гишүүний бүрэн эрхийг түдгэлзүүлэх саналыг 2019 оны нэгдүгээр сард Ерөнхий прокурор УИХ-д оруулсан ч дэмжигдээгүй юм. Харин Б.Батзориг гишүүн ийнхүү “алхам хийсэн”-ээр өнөө дөрвөн гишүүн тайван суух боломжгүй байдал үүснэ. Тодруулбал, Улсын ерөнхий прокуророос ЖДҮХС-гийн зээлийн хэрэгт холбогдсон дөрвөн гишүүний бүрэн эрхийг түдгэлзүүлэх саналыг УИХ-д дахин оруулахаар болсон талаар эх сурвалжийн мэдээлэл байна. Энэ Засгийн газрын нэрийг, хийж хэрэгжүүлж буй ажлыг шороотой хутгасан энэ үйлдэл шударга ёсны үүднээс ч, улстөрийн өнцгөөр ч яригдаж, хариуцлага хүлээлгэх шалтгаантай үйлдэл юм.