УИХ-ын гишүүн Л.Болдоос цаг үеийн асуудлаар дараах тодруулгыг авлаа.
- УИХ-ын ээлжит сонгуулийг хойшлуулах талаар Ерөнхийлөгч санал гаргалаа. Энэ талаар та ямар байр суурьтай байна вэ?
- Дэлхий нийт коронавирусийн эсрэг тэмцэж байна. Улс төр байтугай, бүх хурал чуулган, тэмцээн уралдаан, олимпоо хүртэл хүн төрөлхтөн хойшлууллаа. Вирусийг сонгуулийн гол зэвсэг болгож байна. Вирусээр дамжиж улстөржиж, талцаж байгаа улс орон манайхаас өөр байна уу. Өнөөдөр Монголд үүн шиг хэрэггүй юм алга. Цар тахлын ард гарсны дараа сонгуулиа хийж болно, Үндсэн хуулиа л барих хэрэгтэй.
- Таныг АН-д буцаж элсэх гэж байгаа гэсэн яриа гарсан. Энэ үнэн үү?
- Ташаа мэдээлэл байна.
- Таны улс төрийн ирээдүйн төлөвлөгөө юу вэ?
- ШИНЭН, ШИНЭ эвслийн мөрийн хөтөлбөр батлагдаж гарсан. Үүнд тусгасан хөгжлийн төлөөх олон чухал асуудал байгаа. Сонгуульд амжилттай оролцож, энэ хөтөлбөрүүдээ хэрэгжүүлэхийн төлөө намынхаа гишүүд, дэмжигчид, шинэ шударга нийгэм хүсэж байгаа монголчуудтайгаа хамтдаа зүтгэх болно. Мөн ойрын хугацаанд УИХ-ын чуулган цахимаар явах байх, чуулгандаа оролцож, цаг үеийн асуудлуудаар байр сууриа илэрхийлнэ.
- Охиныг тань коронавирус туссан байх магадлалтай гэх мэдээлэл байсан. Энэ тухайд?
- Гүтгэлэг, доромжлол туйлдаа хүрч манай гэр бүл рүү дайрч эхэлсэн. Зохион байгуулалттайгаар ийм гүтгэлэг тарааж байгаа этгээдүүдэд хуулийн байгууллага таарсан хариуцлагыг нь үүрүүлэх байх.
- ШИНЭН УИХ-ын ээлжит сонгуульд бусад намтай нэгдэн эвсэл болон оролцохоо мэдэгдсэн. Энэ эвсэлд хэчнээн нам нэгдээд байна. Та намдаа ямар алба хашиж байна вэ?
- ШИНЭ эвсэлд улс төрийн 11 нам, 100 гаруй төрийн бус байгууллагууд, мэргэжлийн холбоод нэгдсэн. Миний хувьд ШИНЭ намын Төв зөвлөлийн даргын ажлыг эрхэлж байна.
- Коронавирусийн халдвартай холбоотой тусгаарлалт, эмчилгээ хэр байгаа талаар мэдээлэл өгөөч?
- Бүх зүйл ном, журмын дагуу байгаа. Эмч, эмнэлгийн мэргэжилтнүүд маань нойр хоолгүй хүн ардынхаа эрүүл энхийн төлөө, цаашлаад улс үндэстнийхээ аюулгүй байдлын төлөө зүтгэж байна. Энэ ташрамд нэг зүйлийг хэлэхэд, намайг эрүүл мэндийн салбарын тухай хэлээгүй үгээр минь үг хийж, гүтгэх бүхэл бүтэн кампанит ажил олон нийтийн сүлжээнд өрнөж байна.
- Таван гишүүний хамтын ажил, нөхөрлөлд ан цав гарсан гэсэн үнэн үү?
- Ийм зүйл огтоос байхгүй.
- Та Хан-Уул дүүрэгтээ нэр дэвших үү?
- ШИНЭ эвслээс надад итгэл хүлээлгэвэл тойрогтоо очих нь дамжиггүй.
Улаанбаатар °C 
