Т.Энхтүвшин: Францын иргэнийг шинжилгээ авсан эмчтэй нь хамт тусгаарласан

Дорноговь аймгийн Засаг Дарга Т.Энхтүвшин:

-Эхний ээлжид аймаг руу орох гарах хөдөлгөөнийг хаасан. Ард иргэдийг тайван, хариуцлагатай байлгах үүднээс сурталчилгааны ажил хийж байна. Улаанбадрах суманд цагдаа болон онцгой байдлын хүчний нэмэлт хамгаалалт гаргасан. Мөн Дорноговь аймагт бараг 90-н хүн тусгаарлагдсан байж байна. Анхны дуудлагыг 8-нд “халуураад байна” гэж өгсөн байгаа. Тэгээд аймгийн нэгдсэн эмнэлэг, аймгийн цагдаагийн газар 8-нд очоод тусгаарласан байгаа. Тэгээд тусгаарлаад шинжилгэг явуулаад “эерэг” гэсэн дүн гарсан тул вагоноор хамт ирсэн хүмүүсийг тусгаарлах арга хэмжээ авсан. Мөн вагоноор хамт ирсэн хүмүүсийн ойрын хавьтагчдыг олж илрүүлж, гэрт нь тусгаарлан ажиглалт хийх, тандалт хийх ажил хийж байна.

-Тусгаарлагдсан хүмүүсийн дунд халуурсан шинж тэмдэгтэй хүн бий юу?

-Тийм хүн байхгүй.

-Францын иргэний биеийн байдал ямар байна вэ? ЭМЯ-аас хүмүүс очоод аймгийн эмнэлэг дээр тусгаарлах юм уу эсвэл ХӨСҮТ-д авчрах юм уу?

-Анх тусгаарласан газар нь аймгаас 70 км газар. Өөрийнхөө кэмп дээрээ л байгаа. Энэ хүн гуравдугаар сарын 2-ны өглөө ОХУ-аар дамжин Улаанбаатарт ирсэн юм байна лээ. Тэгээд Улаанбаатар хотын Баянгол зочид буудалд 5 хоносон. Тэгээд 6-ны орой суудалд суугаад 7-нд өглөө 6,50 гэхэд Дорноговь дээр ирээд ямар нэг хүнтэй уулзалгүйгээр шууд кэмп дээрээ ирсэн байсан. Тэгээд 7-ынхоо орой халуураад 8-нд бид нар халууныг нь үзээд шинжилгээний дээжийг нь ХӨСҮТ рүү явуулаад эмчтэй нь хамт тусгаарласан байсан. Тэр хүний байдал бие нь хэвийн байна гэж байна. Кэмп нь өөрөө орчин үеийн шаардлага хангасан эмнэлэгтэй тул аймгийн эмнэлэг рүү авирч тусгаарлах шаардлагагүй. Эмчилгээг цагдаа, онцгой байдал мэргэжилтнүүд ажиллаж байна. “Зөөгч овоо” дээр 22 хүн, “Дулаан уул” гээд кэмпээс нь 25 км байдаг газар 37 хүн, дээр нь вагонд энэ хүн дангаар явсан ч зэргэлдээх купенд сууж явсан 28 хүний 2-ыг нь Замын –үүд дээр, 26-г нь МСҮТ дээр тусгаарлаад ажиглалт хийж байна. Ойр явсан бүх хүнийг олоод тусгаарлах арга хэмжээ аваад явж байна.